கள்ள ஓட்டுப் போடுவதாக கூறப்பட்டதால் மோதல்
அதேபோல், வீரப்பன்சத்திரம் பிரதான சாலையில் அமைக்கப்பட்டிருந்த வாக்குச் சாவடியில் திமுகவினர் கள்ள ஓட்டுப் போடுவதாக கூறி, நாம் தமிழர் கட்சியின் வாக்குச் சாவடி முகவர்கள், சுயேச்சை வேட்பாளர் லோகநாதன் ஆகியோர் வாக்குவாதத்தில் ஈடுபட்டனர். அப்போது, அங்கிருந்த திமுகவினருக்கும், நாம் தமிழர் கட்சி நிர்வாகிகள் இருவர் மற்றும் சுயேச்சை வேட்பாளர் லோகநாதனுக்கும் இடையே மோதல் ஏற்பட்டது. இதில், நாம் தமிழர் கட்சி முகவர்கள், சுயேச்சை வேட்பாளர் லோகநாதன் தாக்கப்பட்டனர். இதையடுத்து அங்கு வந்த போலீஸார் நாம் தமிழர் கட்சியின் வாக்குச் சாவடி முகவர்கள், சுயேச்சை வேட்பாளர் லோகநாதன் காவல் நிலையம் அழைத்துச் சென்றனர். இதையடுத்து அந்த வாக்குச் சாவடியில் பலத்த போலீஸ் பாதுகாப்பு போடப்பட்டது.
இதைத் தொடர்ந்து, செய்தியாளர்களைச் சந்தித்த மாவட்டத் தேர்தல் அலுவலர் ராஜ்கோபால் சுன்காரா, “வாக்குப் பெட்டிகள் அனைத்தும் சித்தோட்டில் உள்ள அரசுக் கல்லூரியில் பலத்த போலீஸ் பாதுகாப்புடன் வைக்கப்பட்டுள்ளது. கள்ள ஓட்டுப் போடப்படுவதற்கான வாய்ப்புகள் மிகக் குறைவு. ஏனென்றால் வாக்குப் பதிவு ஒவ்வொரு வேட்பாளர்களின் முகவர்களின் முன்னிலையில் நடைபெறுகிறது. எந்த ஆதாரத்தை வைத்து வாக்களிக்கிறார்கள் என்பது 17ஏ பதிவேட்டில் விரிவாக எழுதப்படுகிறது. எல்லோருக்கும் கையில் மையும் வைக்கப்படுகிறது. 14 இடங்களில் வாக்குப் பதிவு இயந்திரங்களில் சிறிய கோளாறு ஏற்பட்டது. அது உடனடியாக சரி செய்யப்பட்டது.” என்றார்.
