சென்னை சேப்பாக்கம் மைதானத்தில் மே 12-ஆம் தேதி நடைபெறும் ஐபிஎல் போட்டிக்கான டிக்கெட் விற்பனை இன்னும் சற்றுநேரத்தில் தொடங்கவுள்ளது.
சென்னை சூப்பா் கிங்க்ஸ் – ராஜஸ்தான் ராயல்ஸ் அணிகளுக்கு இடையே வரும் மே 12-ஆம் தேதி லீக் போட்டி நடைபெறவுள்ளது. சென்னை மைதானத்தில் நடைபெறும் கடைசி லீக் போட்டி இதுவாகும்.
அகமதாபாத்தில் வெள்ளிக்கிழமை குஜராத் டைட்டன்ஸ் அணியுடன் மோதும் சென்னை சூப்பர் கிங்ஸ், மே 12 சென்னையில் ராஜஸ்தானுடனும், மே 18 பெங்களூருவில் ராயல் சேலஞ்சர்ஸ் அணியுடனும் மோதவுள்ளன.
இந்திய கிரிக்கெட் அணியின் முன்னாள் கேப்டனும், சென்னை சூப்பர் கிங்ஸ் அணி வீரருமான மகேந்திர சிங் தோனியின் கடைசி ஐபிஎல் தொடராக இது இருக்கக்கூடும் எனக் கூறப்படுகிறது.
இதுவரை 11 போட்டிகளில் விளையாடியுள்ள சென்னை அணி, 6 வெற்றிகளுடன் புள்ளிப்பட்டியலில் 4-வது இடத்தில் உள்ளது. மீதமுள்ள 3 போட்டிகளில் 2-ல் வெற்றி பெற்றால் மட்டுமே ப்ளே-ஆஃப் சுற்றுக்கு முன்னேறும் வாய்ப்பு உறுதியாகும்.
மேலும், முதல் இரண்டு ப்ளே-ஆஃப் போட்டிகளும் அகமதாபாத் மைதானத்தில்தான் நடைபெறவுள்ளது. அதன்பிறகு எலிமினேட்டர் மற்றும் இறுதிப் போட்டிகள் சென்னை மைதானத்தில் நடைபெறவுள்ளது.
இந்த நிலையில், புள்ளிப்பட்டியலில் முதல் இரண்டு இடங்களில் சென்னை அணி வந்தால், முதல் ப்ளே-ஆஃப் சுற்றில் வெற்றி பெற்று இறுதிப் போட்டியில் சென்னை மைதானத்தில் விளையாடும்.
அல்லது இரண்டாவது ப்ளே-ஆஃப்பில் வெற்றி பெற்று எலிமினேட்டர் போட்டியில் சென்னை மைதானத்தில் விளையாட வாய்ப்பு கிடைக்கும்.
இந்த சூழலில், சென்னை மைதானத்தில் ராஜஸ்தான் அணிக்கு எதிராக தோனி விளையாடும் கடைசிப் போட்டியாகக் கூட மாற வாய்ப்புள்ளது.
இதனால், சென்னை மைதானத்தில் தோனி விளையாடும் காட்சியை இறுதியாக ஒருமுறை பார்ப்பதற்காக டிக்கெட் பெறுவதற்கு கிரிக்கெட் ரசிகர்கள் ஆர்வமாக இருக்கிறார்கள்.
இன்று காலை 10.40 மணியளவில் இணையதளத்தில் டிக்கெட் விற்பனை தொடங்கவுள்ளது.
