காங்கிரஸ் தலைவர்களில் ஒருவரும் ராகுலுக்கு நெருக்கமானவருமான பித்ரோடா, அண்மையில் பரம்பரை வரி குறித்து தெரிவித்த கருத்து பெரும் சர்ச்சையை கிளப்பியது. இந்தநிலையில், ஆங்கில நாளிதழ் ஒன்றுக்கு அவர் அளித்துள்ள பேட்டியில், தென் இந்தியாவில் வசிப்பவர்கள் பார்ப்பதற்கு ஆப்ரிக்கர்கள் போல் இருப்பதாக தெரிவித்துள்ளார்.
வட இந்தியர்கள் வெள்ளையாகவும், மேற்கு இந்தியாவில் வசிக்கும் இந்தியர்கள் பார்ப்பதற்கு அரேபியர் போல இருப்பதாகவும், இந்தியாவின் கிழக்குப் பகுதிகளில் வசிப்பவர்கள் பார்ப்பதற்கு சீனர்கள் போல் இருப்பதாகவும் சாம் பித்ரோடா கூறியுள்ளார்.
காங்கிரஸ் மூத்த தலைவரான சாம் பித்ரோடாவின் இந்த கருத்து பெரும் சர்ச்சையை கிளப்பி இருக்கிறது. அவரது கருத்துக்கு பாஜக உள்ளிட்ட கட்சித் தலைவர்கள் கடும் கண்டனம் தெரிவித்துள்ளனர்.
சாம் பித்ரோடாவின் இந்த இனவெறி கருத்து அவரது சொந்த கருத்து இல்லை என்றும், இது காங்கிரஸ் கட்சியின் கருத்து என்றும் பல்வேறு கட்சி தலைவர்கள் குற்றம்சாட்டியுள்ளனர். அவரது கருத்துக்கு காங்கிரஸ் கட்சி மக்களிடம் மன்னிப்பு கேட்க வேண்டும் எனவும் வலியுறுத்தியுள்ளனர். இந்தியா பல்வேறு வேற்றுமைகளைக் கொண்டிருந்தாலும் ஒற்றுமை கொண்டிருப்பதை குறிப்பிடும் நோக்கில் அவர் தெரிவித்த உதாரணம் சர்ச்சையை ஏற்படுத்தி உள்ளது.
பித்ரோடா பேச்சுக்கு பிரதமர் மோடி கண்டனம்
நிறத்தின் அடிப்படையில் இந்தியர்களை அவமதிப்பதை ஏற்க மாட்டேன் என்று, காங்கிரஸின் சாம் பித்ரோடா கருத்துக்கு கண்டனம் தெரிவித்த பிரதமர் மோடி, தமிழர்களின் பெருமையை காக்க காங்கிரஸ் உடனான கூட்டணியை முதலமைச்சர் ஸ்டாலின் முறிப்பாரா என கேள்வி எழுப்பி உள்ளார்.
தெலங்கானா மாநிலம் வாரங்கல்லில் நடைபெற்ற தேர்தல் பிரசார கூட்டத்தில் பிரதமர் மோடி பங்கேற்று, பொதுமக்களிடையே உரையாற்றினார். அப்போது, பேசிய அவர், இளவரசரின் தத்துவ ஞானியான சாம் பித்ரோடா தெரிவித்த கருத்தால் தாம் கடும் கோபத்தில் இருப்பதாக கூறினார். நாட்டு மக்களின் திறமை தோலின் நிறத்தை வைத்து முடிவு செய்யப்படுகிறதா என்று வினவிய பிரதமர் மோடி, சாம் பித்ரோடாவுக்கு யார் இந்த உரிமையை கொடுத்தது எனவும் கேள்வி எழுப்பினார்.
மதிப்புமிக்க குடியரசுத் தலைவரை சாம் பித்ரோடா நிறத்தை வைத்து அவமதித்து விட்டதாகவும் அவர் கண்டனம் தெரிவித்தார்.
பித்ரோடாவின் பேச்சு பூதாகரமாக வெடித்த நிலையில், தாம் வகித்து வந்த காங்கிரஸ் அயலக அணியின் தலைவர் பதவியை ராஜினாமா செய்துள்ளார். இவரது ராஜினாமாவை காங்கிரஸ் தலைவர் மல்லிகார்ஜூன கார்கே ஏற்றுக் கொண்டார்.
.
