தமிழ்நாடு அரசுப் பள்ளியில் ஆன்மீக சொற்பொழிவு நடத்தப்பட்டிருப்பதும் விநாயகர் சதுர்த்தி தொடர்பான சர்ச்சைக்குரிய சுற்றறிக்கை தரப்பட்டதும், பள்ளிகளில் போலி என்சிசி கேம்ப் நடப்பதென பல்வேறு சர்ச்சைகள் கல்வித்துறை அமைச்சகத்தின் முன் நிற்கிறது. இதுகுறித்து விரிவாக விசாரித்தோம்.
திருச்சி, புதுக்கோட்டை மற்றும் பெரம்பலூர் மாவட்ட பள்ளிகளுக்கு `சுற்றுசூழலுக்கு பாதுகாப்பான விநாயகர் விழா கொண்டாடுதல்’ என்ற சுற்றிறக்கை அனுப்பியது சர்ச்சையாகிய பின்னர் விளக்கமளித்தது அறிக்கையை ரத்து செய்தது தமிழ்நாடு அரசு.
இவ்விவகாரம் ஓய்வதற்குள் சென்னை அசோக் நகரிலுள்ள அரசுப் பள்ளியில் ஆன்மீக சொற்பொழிவாளரை விருந்தினராக அழைத்த விவகாரம் வெடித்திருக்கிறது. அழைப்பாளராக வந்த நபர் அறிவியலுக்கு எதிராகவும், மாற்றுத்திறனாளிகள் குறித்து அவதூறாகவும், மாற்றுதிறனாளி ஆசிரியரிடம் வாக்குவாதம் செய்ததும் பெரும் பிரச்னையாகியிருக்கிறது.
விவகாரம் பூதாகரமாக சம்பந்தப்பட்ட பள்ளிக்கே நேரில் சென்று உரிய நடவடிக்கை எடுப்பதாக உறுதியளித்திருக்கிறார் பள்ளிக் கல்வித்துறை அமைச்சர். தலைமை ஆசிரியரை இட மாறுதல் செய்திருப்பதோடு 4 நாள்களுக்கு உரிய நடவடிக்கை மேற்கொள்ளப்படுமென உறுதியளித்திருக்கிறார் பள்ளிக் கல்வித்துறை அமைச்சர் அன்பில் மகேஷ்.
