சென்னை பிராட்வேயில் இயங்கி வந்த பேருந்து நிறுத்தத்தை நவீனமாக்கப்பட்ட பல்நோக்கு போக்குவரத்து வளாகமாக மாற்றயிருப்பதால், ராயபுரத்தின் மேம்பாலத்திற்கு அருகில் உள்ள 3.5 ஏக்கர் பரப்பளவில் புதிய பேருந்து நிலையம் ரூ.7.5 கோடி செலவில் கட்டப்பட்டு வருகிறது.
தற்போதைக்கு வடசென்னையில் இருக்கும் பெரிய பேருந்து நிலையமென்று சொல்லும் அளவிற்கு இப்பேருந்து நிலையத்தில் சுமார் 60 பேருந்துகள் வரை ஒரே சமயத்தில் நிறுத்த முடியும்.
இப்பேருந்து நிலையத்தில் சுத்திகரிக்கப்பட்ட குடிநீர் வசதி, கழிவறை வசதி, மாற்றுத்திறனாளிகள் பயன்படுத்தும் வகையில் அமைந்த கழிவறைகள், மழைநீர் சேகரிப்புத் திட்டம், பயணிகளுக்கான இருக்கை வசதி, பயணிகளுக்கான காத்திருப்போர் அறை, தாய்மார்களுக்கான பாலூட்டும் அறை, முதலுதவி அறையென பிராட்வே நிலையத்தைக்காட்டிலும் அனைத்து வசதிகளும் கொண்டு கட்டப்பட்டுவரும் இப்பேருந்து நிலையத்தில் 90% வேலை முடிந்திருக்கிறது.
மேலும், பேருந்து நிலையத்தில் ஆவின் கடையை தவிர்த்து மற்ற கடைகளுக்கு அனுமதி மறுக்கப்பட்டிருக்கிறது. காரணம், பிராட்வே பேருந்து நிலையத்தின் பணிகள் மூன்று வருடத்தில் நிறைவடைந்துவிடும் என்பதால் இந்த இடம் மூன்று வருடத்திற்கு மட்டுமே குத்தகை எடுக்கப்பட்டுள்ளது. தேவை இருப்பின் நீட்டிக்கப்படும் என்கிறார் ஏஇ அருண்.
