டெல்லி மதுபானக் கொள்கை ஊழல் வழக்கில் கடந்த மார்ச் மாதம் அமலாக்கத்துறையால் கைதுசெய்யப்பட்டு திகார் சிறையில் அடைக்கப்பட்ட முதல்வர் கெஜ்ரிவாலுக்கு, உச்ச நீதிமன்றம் நேற்று ஜூன் 1-ம் தேதி வரை இடைக்கால ஜாமீன் வழங்கியது. அதோடு, `2022 ஆகஸ்ட்டில் கெஜ்ரிவால்மீது வழக்கு பதிவுசெய்தும் இரண்டாண்டுகளாக ஏன் கைதுசெய்யவில்லை… தேர்தலுக்கு முன்போ அல்லது தேர்தல் முடிந்த பிறகுகூட கைது செய்திருக்கலாம். தேர்தல் நேரத்தில் கைது செய்ததால் என்ன மாற்றம் வந்துவிடப் போகிறது?” என அமலாக்கத்துறையைச் சரமாரியாக உச்ச நீதிமன்றம் கேள்வியெழுப்பியது.
பின்னர், சிறையிலிருந்து வெளிவந்த கெஜ்ரிவால், `கூறியவாறே நான் திரும்ப வந்துவிட்டேன். சர்வாதிகாரத்துக்கு எதிராக தொடர்ந்து போராடுகிறேன்’ என்றார். கூடவே, கட்சி அலுவலகத்தில் நாளை மதியம் செய்தியாளர் சந்திப்பு இருக்கும் என்றும் கெஜ்ரிவால் அறிவித்தார்.
