கர்னல் சோபியா குரேஷி பற்றி கருத்து; சர்ச்சையில் சிக்கிய பாஜக அமைச்சர் குன்வர் விஜய் ஷா

பயங்கரவாதிகள் முகாம் அழிப்பைத் தொடர்ந்து, பாகிஸ்தான் இந்திய கிராமங்களின் மீது நடத்திய தாக்குதலுக்கு இந்தியா பதிலடி கொடுத்தது. இதன் பிறகு இரு நாடுகளுக்கும் இடையே கடுமையான சண்டை நிலவி வந்தது. இதனால், தொடர்ந்து போர் பதற்றமும் ஏற்பட்டது. தற்போது இரு நாடும் சண்டை நிறுத்தத்தை அறிவித்துள்ளன. இதனால், எல்லையில் பதற்றம் சற்று குறைந்துள்ளது.

முன்னதாக இரு நாடும் மாறி மாறி தாக்கி வந்தபோது, தாக்குதல் குறித்த நிலவரங்களை கர்னல் சோஃபியா குரேஷி மற்றும் விங் கமாண்டர் வியோமிகா சிங் ஆகியோர் இணைந்து செய்தியாளர்ச் சந்திப்பில் விளக்கம் அளித்துவந்தனர். இந்நிலையில், ஆபரேஷன் சிந்தூர் பற்றி நாட்டு மக்களுக்கு விளக்கிய கர்னல் சோபியா குரேஷி குறித்து மத்திய பிரதேசம் பாஜக அமைச்சர் குன்வர் விஜய் ஷா தெரிவித்த கருத்து தற்போது பெரும் சர்ச்சையாக வெடித்துள்ளது. பாஜக அமைச்சர், தீவிரவாதிகளுக்கு அவர்களின் சொந்த சகோதரியைப் பயன்படுத்தி பிரதமர் பாடம் கற்பித்ததாக கூறியுள்ளார். இது தற்போது பெரும் சர்ச்சையாக வெடித்துள்ளது.