தமிழகத்தில் வரும் ஏப்ரல் 19 ஆம் தேதி நாடாளுமன்ற மக்களவைத் தேர்தல் நடைபெற உள்ள நிலையில் சேலம் மாவட்டம் கெஜல்நாயக்ன்பட்டி பாஜக பொதுக்கூட்டம் நடைபெறுகிறது. இந்தக் கூட்டத்தில் பிரதமர் மோடி பங்கேற்றுள்ளார். கேரளாவில் இருந்து ஹெலிகாப்டர் மூலம் சேலம் வந்த பிரதமர் மோடி பொதுக்கூட்ட மேடைக்கு வருகை புரிந்தார்.
இந்தக் கூட்டத்தில் பாஜக நிர்வாகிகள் மட்டுமின்றி கூட்டணியில் உள்ள அனைத்துக்கட்சி நிர்வாகிகளும் பங்கேற்றுள்ளனர். பாஜக – பாமக இடையிலான கூட்டணி ஒப்பந்தம் இன்று காலையில் கையெழுத்தான நிலையில் பாமக நிறுவனர் ராமதாஸ், பாமக தலைவர் அன்புமணி, சரத்குமார், ஜான் பாண்டியன், டிடிவி தினகரன், ஓ பன்னீர்செல்வம் என அனைத்து கூட்டணிக் கட்சித் தலைவர்கள் பலரும் பங்கேற்றுள்ளனர்.
கூட்டத்திற்கு வந்த பிரதமர் மோடி, பாமக தலைவர் ராமதாஸின் கைகளை குலுக்கி நலம் விசாரித்து வாழ்த்து தெரிவித்தார். தொடர்ந்து ராமதாஸை கட்டி அணைத்தும் மகிழ்ச்சியை வெளிப்படுத்தினார். முன்னதாக கூட்டத்தில் பேசிய பாமக தலைவர் அன்புமணி ராமதாஸ், பிரதமர் மோடி விளையாட்டுத் துறையை வெற்றி பெற செய்தவ்ர என்றும் விளையாட்டுத்துறையில் அரசியலையும் ஊழலையும் ஒழித்தவர் என்றும் புகழாரம் சூட்டினார்.
மேலும் சாதாரண பின்னணியில் இருந்த வந்தவர் பிரதமர் மோடி என்றும் தனது தந்தையான மருத்துவரான ராமதாஸும் ஏழை விவசாயின் மகன். சாதாரண குடும்பத்தில் இருந்து வந்தவர். தனது தந்தையும் பல்வேறு சமூக புரட்சிகளை மேற்கொண்டுள்ளார். இந்த இரண்டு தலைவர்களும் இதர பிற்படுத்தப்பட்ட சமூதாயத்தை சேர்ந்தவர்கள். இரு பெரும் தலைவர்களை ஒன்று சேர்ந்துள்ளனர். சாதாரண குடும்படுத்தில் பிறந்த மோடி நம் நாட்டை ஆண்டுக்கொண்டிருக்கிறார்.
மீண்டும் மூன்றாவது முறையாக நம் நாட்டை ஆளப்போகிறார். அந்த வெற்றி தவிர்க்க முடியாதது. மாற்றம் தவிர்க்கமுடியாதது, வளர்ச்சி தவிர்க்க முடியாதது. மோடி மீண்டும் பிரதமர் ஆவது உறுதி.. என கூட்டணிக் கட்சித் தலைவர்கள் அனைவரும் அமர்ந்திருந்த மேடையில் உணர்ச்சிப் பெருக்கில் உரையாற்றினார் அன்புமணி ராமதாஸ்.
