தொடர் நஷ்டம் உள்ளிட்ட பல்வேறு காரணங்களால் தனியாருக்கு தாரை வார்க்கப்பட்ட ஏர் இந்தியா விமான நிறுவனம் மீண்டும் சிக்கலில் சிக்கியுள்ளது.
தொடர் நஷ்டம், ஊழியர்களின் ஒத்துழைப்பின்மை உள்ளிட்ட பல்வேறு காரணங்களால், டாடா நிறுவனத்திற்கு ஏர் இந்தியா விமான நிறுவனத்தை, மத்திய அரசு விற்பனை செய்தது. இதையடுத்து, ஏர் இந்தியா நிறுவனத்தை மெருகேற்றிய டாடா நிறுவனம், உள்நாடு மற்றும் வெளிநாடுகளுக்கு விமான சேவைகளை வழங்கி வருகிறது.
இந்நிலையில், ஏர் இந்தியா நிறுவனத்தின் ஒரு பிரிவாக செயல்படும் ஏர் இந்தியா எக்ஸ்பிரஸ் விமானங்களில் பணிபுரியும் 300க்கும் மேற்பட்ட ஊழியர்கள், ஒரே நேரத்தில் திடீர் விடுப்பு எடுத்து போராட்டத்தில் குதித்துள்ளனர். இதனால், உள்நாடு மற்றும் வெளிநாடுகளுக்கு செல்ல வேண்டிய 79 விமானங்களின் பயணங்கள் ரத்து செய்யப்பட்டுள்ளன. இதையடுத்து, இந்த விமானங்களில் முன்பதிவு செய்துள்ள பயணிகள் பலர், விமான நிலையங்களில் தவித்து வருகின்றனர்.
உடல் நிலை சரியில்லை என 300க்கும் மேற்பட்ட ஊழியர்களும் ஒரே நேரத்தில் விடுப்பு எடுத்திருப்பதோடு, தங்களது செல்போன்களையும் ஸ்விட்ச் ஆஃப் செய்து வைத்துள்ளனர். வேலை தொடர்பாக புதிய கட்டுப்பாடுகளை, ஏர் இந்தியாவை நிர்வகித்து வரும் டாடா நிறுவனம் கொண்டுவந்ததே, இத்தகைய போராட்டத்திற்கு காரணம் என கூறப்படுகிறது.
இதையடுத்து, பயணிகளின் கேள்விகளுக்கு பதிலளிக்க முடியாமல் தவித்து வரும் ஏர் இந்தியா விமான நிறுவனம், விமானிகள் மற்றும் பணிப்பெண்கள் உள்ளிட்டோரை தொடர்பு கொள்ள பல்வேறு முயற்சிகளை மேற்கொண்டு வருவதாக கூறியுள்ளது. மேலும், இந்த இடையூறுக்காக, பயணிகளிடம் வருத்தம் தெரிவித்துள்ள ஏர் இந்தியா நிறுவனம், முன்பதிவு செய்தவர்களுக்கு முழு தொகையை திருப்பி வழங்கவோ, அல்லது வேறொரு பயணத்தை முடிவு செய்யவோ உரிமை வழங்கப்பட்டுள்ளதாகவும் தெரிவித்துள்ளது.
.
