அப்பாடா.. இழுபறிக்கு பிறகு கிடைத்துவிட்டது பானை சின்னம்.. வென்றது விடுதலை சிறுத்தைகள் போராட்டம்..

சென்னை: வரும் லோக்சபா தேர்தலில் தொல் திருமாவளவனின் விடுதலை சிறுத்தைகள் கட்சிக்கு பானை சின்னம் ஒதுக்கீடு செய்யப்பட்டுள்ளது.

தமிழகத்தில் திமுக கூட்டணியில் தொல் திருமாவளவனின் விடுதலை சிறுத்தைகள் கட்சி 2 தொகுதிகளில் போட்டியிடுகிறது. கடந்த 2019 தேர்தலை போல் மீண்டும் சிதம்பரம், விழுப்புரம் தொகுதிகளில் விடுதலை சிறுத்தைகள் கட்சி களமிறங்கி உள்ளது.

இதில் சிதம்பரம் தொகுதியில் சிட்டிங் எம்பியாக உள்ள திருமாவளவனும், விழுப்புரம் தொகுதியில் சிட்டிங் எம்பியான விடுதலை சிறுத்தைகள் கட்சியின் ரவிக்குமாரும் மீண்டும் போட்டியிடுகின்றனர்.

இந்நிலையில் தான் பானை சின்னத்தை தங்கள் கட்சிக்கு ஒதுக்க வேண்டும் என விடுதலை சிறுத்தைகள் கட்சி சார்பில் இந்திய தேர்தல் ஆணையத்திடம் விண்ணப்பம் செய்யப்பட்டது. ஆனால் இந்திய தேர்தல் ஆணையம் ஒதுக்கீடு செய்ய மறுத்தது. இதற்கிடையே தான் இன்று வேட்புமனு வாபஸ் பெற கடைசி நாளான இன்று இறுதிக்கட்ட வேட்பாளர் பட்டியல் வெளியிடும் பணி தீவிரமாக நடந்து வந்தது.

மேலும் சுயேச்சை வேட்பாளர்களுக்கு சின்னங்கள் ஒதுக்கீடு செய்யப்பட்டன. அதன்படி விடுதலை சிறுத்தைகள் கட்சிக்கு பானை சின்னம் ஒதுக்கீடு செய்யப்பட்டுள்ளது. விழுப்புரம் மற்றும் சிதம்பரம் தொகுதியில் எந்த வேட்பாளர்களும் பானை சின்னத்தை கேட்கவில்லை. இதையடுத்து விடுதலை சிறுத்தைகள் கட்சிக்க பானை சின்னம் வழங்கப்பட்டது.

இதன்மூலம் வரும் லோக்சபா தேர்தலில் சிதம்பரத்தில் திருமாவளவனும், விழுப்புரத்தில் ரவிக்குமாரும் பானை சின்னத்தில் போட்டியிடுவது உறுதியாகி உள்ளது.