அ.தி.மு.க-வின் 53-ம் ஆண்டு விழா அந்தக் கட்சியினரால் இன்று தமிழ்நாடு முழுவதும் கொண்டாடப்பட்டு வருகிறது. இந்த நேரத்தில் அ.தி.மு.க-வின் வரலாற்றில் முக்கியமான தருணங்கள் குறித்துப் பார்க்கலாம்:-
1972-ம் ஆண்டு அக்டோபர் 8-ம் தேதி, சென்னை லாயிட்ஸ் ரோட்டிலும், திருக்கழுங்குன்றத்திலும் பொதுக்கூட்டம் நடந்தது. இரண்டு கூட்டங்களிலும், தி.மு.க-வில் ஊழல் மலிந்துவிட்டதாகவும், கட்சியின் வரவு செலவுக் கணக்கு கேட்டும் பல குற்றச்சாட்டுகளை அடுக்கினார் எம்.ஜி.ஆர். அதைத் தொடர்ந்து அக்டோபர் 10-ம் தேதி, எம்.ஜி.ஆர் கட்சியிலிருந்து தற்காலிகமாக நீக்கப்படுகிறார். அவரிடம் விளக்கம் கேட்டு நோட்டீஸ் அனுப்பப்படுகிறது. தொடர்ந்து, அக்டோபர் 14-ம் தேதி கட்சியிலிருந்து நிரந்தரமாக நீக்கப்படுகிறார் எம்.ஜி.ஆர். பத்திரிகையாளர் சந்திப்பின்போது, `உங்களைக் கட்சியிலிருந்து நீக்கிவிட்டார்கள்’ என்று சொல்ல, `எல்லாருக்கும் பாயசம் கொடுங்க” என்பதே எம்.ஜி.ஆரின் பதிலாக இருந்தது.
