தலைமை தேர்தல் ஆணையராக ஞானேஷ் குமார் இன்று பதவி ஏற்றார்

தலைமை தேர்தல் ஆணையராக இருந்த ராஜீவ் குமாரின் பதவிக்காலம் நேற்று நிறைவடைந்தது. இதையொட்டி, பிரதமர் மோடி தலைமையிலான தேர்வுக் குழு டெல்லியில் கூடி, தேர்தல் ஆணையராக இருந்த ஞானேஷ் குமாரை தலைமை தேர்தல் ஆணையராக தேர்வு செய்தது. முன்னதாக, இந்தக் குழு கூட்டத்தில் பங்கேற்ற மக்களவை எதிர்க்கட்சித் தலைவர் ராகுல் காந்தி, ஞானேஷ் குமாரின் நியமனத்துக்கு ஆட்சேபம் தெரிவித்தார். தேர்வுக் குழு தொடர்பான வழக்கு உச்சநீதிமன்றத்தில் நிலுவையில் உள்ள நிலையில், உத்தரவுக்கு பிறகு முடிவு எடுக்கலாம் என ராகுல் காந்தி கூறியதாகத் தெரிகிறது.

இந்த சூழலில், ஞானேஷ் குமாரை தலைமைத் தேர்தல் ஆணையராக நியமிக்க குடியரசுத் தலைவர் ஒப்புதல் அளித்தார். இதனைத் தொடர்ந்து, தலைமைத் தேர்தல் ஆணையராக ஞானேஷ்குமார், இன்று காலை பதவி ஏற்றுக்கொண்டார். அடுத்த 4 ஆண்டுகளுக்கு ஞானேஷ் குமார் இந்த பதவியில் இருப்பார்.

கேரள பேட்ச் ஐஏஎஸ் அதிகாரியான இவர் மத்திய அரசின் பல்வேறு துறைகளில் பணியாற்றி உள்ளார். குறிப்பாக காஷ்மீருக்கான சிறப்பு அந்தஸ்து நீக்கப்பட்ட போது மத்திய உள்துறையின் கூடுதல் செயலாளராக ஞானேஷ் குமார் இருந்தார் என்பது குறிப்பிடத்தக்கது.

இதையும் படிங்க : புதிய தலைமை தேர்தல் ஆணையர் இன்று பதவி ஏற்பு – நியமனம் தொடர்பான வழக்கை விசாரிக்கும் உச்சநீதிமன்றம்!

பதவி ஏற்றபின் செய்தியாளர்களிடம் பேசிய அவர், “18 வயதை கடந்த இந்திய குடிமக்கள் அனைவரும், வாக்காளர்களாக வேண்டும். அவர்கள் நிச்சயம் வாக்களிக்க வேண்டும். அரசியல் சட்ட சாசனத்தின் படி, தேர்தல் சட்டங்கள், விதிகள், வழிமுறைகளிபடி இந்திய தேர்தல் ஆணையம் எப்போதும் மக்களுடன்தான் இருந்தது, இனியும் இருக்கும்” என்றார்.