டெல்லியில் காங்கிரஸ் கட்சிக்கு நிரந்தர தலைமை அலுவலகம்… ஜன.15-ம் தேதி திறப்பு! | Congress party to have permanent headquarters in Delhi

சுதந்திரப்போராட்ட காலத்திலும் சரி, சுதந்திரத்திற்கு பிறகும் காங்கிரஸ் கட்சி ஒரு இடத்தில் நிரந்தமாக இருந்ததில்லை. அதன் அலுவலகம் டெல்லியில் தொடர்ந்து மாறிக்கொண்டே இருந்தது. வரும் டிசம்பர் மாதம் 140-வது ஆண்டை கொண்டாடும் காங்கிரஸ் கட்சி கடந்த 1930ம் ஆண்டு அலகாபாத்தில் மோதிலால் நேரு கட்டிய ஆனந்த் பவனில் தனது பயணத்தை தொடங்கியது.

நாடு சுதந்திரம் அடைவதற்கு முன்பு 1947-ம் ஆண்டு காங்கிரஸ் அலுவலகம் உத்தரப்பிரதேசத்தில் இருந்து டெல்லிக்கு வந்தது. டெல்லியில் உள்ள ஜந்தர் மந்திர் சாலையில் உள்ள அலுவலகத்தில் கட்சி செயல்படத்தொடங்கியது. நாடு பிரிவினை தொடர்பாக இந்த அலுவலகத்தில்தான் பேச்சுவார்த்தை நடத்தப்பட்டது.

1969-ம் ஆண்டு காங்கிரஸ் கட்சியில் முதல் பிரிவினை ஏற்பட்டது. அப்போது காங்கிரஸ் கட்சியின் ஜந்தர் மந்தர் அலுவலகம் நிஜலிங்கப்பா தலைமையிலான அணிக்கு சென்றுவிட்டது. இதனால் இந்திரா காந்தி தலைமையிலான அணியின் அலுவலகம் ராஜேந்திர பிரசாத் சாலைக்கு சென்றது. அதன் பிறகு 1977ம் ஆண்டு நிஜலிங்கப்பா அணி ஜனதா கட்சியுடன் சேர்ந்தது. இதனால் ஜந்தர் மந்திர் அலுவலகம் ஜனதா கட்சியின் அலுவலகமாகவும் மாறியது. அதன் பிறகு ஜனதா கட்சியில் பல முறை பிளவு ஏற்பட்டது. இறுதியாக 1993ம் ஆண்டு அரசின் உத்தரவை தொடர்ந்து அந்த அலுவலகம் மத்திய அரசின் கட்டுப்பாட்டில் வந்தது.

1978ம் ஆண்டு காங்கிரஸ் கட்சி மீண்டும் ஒரு பிளவைச் சந்தித்தது. இதையடுத்து இந்திரா காந்தி தலைமையிலான அணி தற்போது காங்கிரஸ் அலுவலகம் இருக்கும் அக்பர் சாலைக்கு வந்தது.

1978-ம் ஆண்டு காங்கிரஸ் கட்சி இரண்டாக பிரிந்தபோது இந்திரா காந்தி தலைமையிலான அணியை உண்மையான காங்கிரஸ் என்று தேர்தல் கமிஷன் அறிவித்தது. காங்கிரஸ் கட்சியில் இருந்து பிரிந்த அணி கடந்த 1985ம் ஆண்டு சரத்பவார் தலைமையில் நாக்பூரில் நடந்த பொதுக்கூட்டத்தில் காங்கிரஸ் கட்சியில் தன்னை இணைத்துக்கொண்டதோடு, அதன் அலுவலகத்தையும் காங்கிரஸ் கட்சியிடம் ஒப்படைத்தது. அந்த அலுவலகத்தையும் காங்கிரஸ் கட்சி 1991-ம் ஆண்டு வரை பயன்படுத்தி வந்தது.