மகாராஷ்டிரா சட்டமன்றத் தேர்தல் நவம்பர் மத்தியில் நடக்க இருக்கும் நிலையில் அதற்கான அறிவிப்பு எந்நேரமும் வெளியாகும் என்ற நிலை இருக்கிறது. இதனால், சிவசேனா – பா.ஜ.க., கூட்டணி அரசு அவசர அவசரமாகப் பல்வேறு திட்டங்களை அறிவித்துக் கொண்டிருக்கிறது.
நேற்று பிரதமர் நரேந்திர மோடி ஒரே நாளில் காணொளி காட்சி மூலம் ரூ.11200 கோடி மதிப்பிலான திட்டங்களைத் தொடங்கி வைத்தார். இன்று மகாராஷ்டிரா அமைச்சரவை அவசரமாகக் கூடியது. இந்த அமைச்சரவைக் கூட்டத்தில் ஒரே நேரத்தில் 38 முடிவுகள் எடுக்கப்பட்டன. அதோடு இதில் பசு மாட்டைத் தாயாக அறிவிக்க முடிவு செய்யப்பட்டது. அதாவது, ராஜமாதாவாக அறிவிக்கப்பட்டது. இதிகாசக் காலங்களிலிருந்து பசுவைப் புனிதமாகக் கருதுவதாலும், கிருஷ்ணருக்குப் பசு நெருக்கமானது என்பதாலும் இம்முடிவு எடுக்கப்பட்டதாகச் சொல்லப்படுகிறது.
பசுவின் பால், சாணம், கோமியம் போன்ற அனைத்துமே பல்வேறு தேவைகளுக்குப் பயன்படுகின்றன. இந்தியக் கலாச்சாரத்திலும் பசு ஒன்றி இருக்கிறது. அதனைக் கருத்தில் கொண்டு பசுவை மகாராஷ்டிராவின் ராஜமாதாவாக அறிவித்து முடிவு எடுக்கப்பட்டது.
இது குறித்து துணை முதல்வர் தேவேந்திர பட்னாவிஸ் அளித்த பேட்டியில், “நாட்டுப் பசுமாடுகள் விவசாயத்தில் முக்கிய பங்கு வகிக்கின்றன. எனவேதான் அதற்குத் தாய் அந்தஸ்து கொடுத்து முடிவு செய்யப்பட்டுள்ளது. கோஷாலாக்களில் நாட்டு மாடுகளின் இனப்பெருக்கத்தை அதிகரிக்கத் தேவையான உதவிகள் வழங்கப்படும்” என்றார். நாட்டில் முதல் முறையாக உத்தரகாண்ட மாநிலம் பசுவிற்குத் தாய் அந்தஸ்து வழங்கியது.
