காவல்துறை வெளியிட்ட பரபரப்பு அறிக்கை… மீண்டும் வெடித்த போராட்டம்..!

ஆந்திரப்பிரதேச மாநிலம், குண்டூரைச் சேர்ந்தவர் ரோஹித் வெமுலா. இவர் “மாலா’ என்ற பட்டியலினத்தைச் சேர்ந்த குடும்பத்தில் பிறந்தவர். ஹைதராபாத் பல்கலைக் கழகத்தில் பிஹெச்.டி இரண்டாம் ஆண்டு படித்து வந்தார்.

ரோஹித் வெமுலாவின் தந்தை சிறு வயதிலேயே குடும்பத்தை விட்டுச் சென்று விட்டதால், தாயின் அரவணைப்பில் வளர்ந்துள்ளார். ஹைதராபாத் பல்கலைக் கழகத்தில் அம்பேத்கர் மாணவர் அமைப்பின் தலைவராக இருந்த ரோஹித் வெமூலா, சாதிய ஒடுக்குமுறைகளுக்கு எதிராக பல்வேறு போராட்டங்களை நடத்தியவர்.

மும்பை குண்டுவெடிப்பு வழக்கில் யாகூப் மேமனுக்கு தூக்குத்தண்டனை நிறைவேற்றப்பட்டதைக் கண்டித்து, அவரது தலைமையிலான அம்பேத்கர் மாணவர் அமைப்பினர் போராட்டம் நடத்தினர். பாஜக-வின் மாணவர் அமைப்பான ஏ.பி.வி.பி இதை எதிர்க்க, இரு தரப்பினருக்கும் இடையே மோதல் ஏற்பட்டது. இறுதியில் ரோஹித் வெமுலாவும் அவரது நண்பர்களும் பல்கலைக் கழகத்திலிருந்து இடை நீக்கம் செய்யப்பட்டனர். இதற்கு அப்போது மத்திய இணை அமைச்சராக இருந்த பண்டாரு தத்தாத்ரேயா, மனிதவள மேம்பாட்டுத் துறை அமைச்சராக இருந்த ஸ்மிருதி இரானி, பல்கலைகழக துணை வேந்தர் அப்பா ராவ் ஆகியோர் தான் காரணம் என குற்றச்சாட்டு எழுந்தது. ரோஹித் வெமுலாவின் இடைநீக்கத்தைக் கண்டித்து பல போராட்டங்கள் நடைபெற்றதன் எதிரொலியாக, அவரின் இடைநீக்கம் ரத்து செய்யப்பட்டது.

எனினும் பல்கலைகழக விடுதியில் தங்க அனுமதி மறுக்கப்பட்டது. இந்த சூழலில் ரோஹித் வெமுலா 2016- ஆம் ஆண்டு திடீரென தற்கொலை செய்துகொண்டார். தனது இறப்புக்கு யாரும் கண்ணீர் சிந்த வேண்டாம்; தனக்கு உயிருடன் இருப்பதை விட, மரணமடைவதே மகிழ்ச்சி அளிக்கும் என அவர் எழுதிய கடிதமும் கிடைத்தது. வெமுலாவின் மரணம் நாடு முழுவதும் பெரும் போராட்டங்களுக்கு வித்திட்டது.

இதனை தொடர்ந்து ஒரு நபர் ஆணையம் அமைக்கப்பட்டு விசாரணை நடைபெற்று வந்தது. இந்நிலையில், தெலங்கானா காவல்துறை அம்மாநில உயர் நீதிமன்றத்தில் அறிக்கை தாக்கல் செய்துள்ளது. மேலும், பட்டியல் இனத்தை சேராத வெமுலாவுக்கு அவரது தாய், பட்டியல் இனத்தவர் என சான்றிதழ் பெற்றதாகவும் அந்த அறிக்கையில் குறிப்பிடப்பட்டுள்ளது.

அவரின் தற்கொலைக்கு எவ்வித வெளி அழுத்தமும் காரணம் இல்லை எனவும், தனது உண்மையான சாதி குறித்த தகவல் வெளி வந்து விடுமோ என்ற அச்சத்தில் தற்கொலை செய்துகொண்டதாகவும் கூறப்பட்டுள்ளது. வெமுலா குடும்பத்தினர் தங்களது சாதி குறித்து தவறான தகவல்களை அளித்துள்ளதாகவும் அறிக்கையில் குறிப்பிடப்பட்டுள்ளது. ரோஹித் வெமுலாவை தற்கொலைக்கு தூண்டியதற்கான ஆதாரங்கள் இல்லை என்பதால் இந்த வழக்கு முடித்து வைக்கப்படுவதாக காவல் துறை தெரிவித்துள்ளது.

மீண்டும் போராட்டம்

இதையடுத்து காவல்துறையின் அறிக்கையை கண்டித்து ஹைதராபாத் பல்கலைக் கழக மாணவர்கள் போராட்டம் நடத்தினர்.
காவல் துறையின் அறிக்கை அபத்தமானது என ரோஹித் வெமுலாவின் சகோதரர் ராஜா வெமுலா கூறியுள்ளார். தெலங்கானா முதலமைச்சர் ரேவந்த் ரெட்டியை சந்தித்து இது குறித்து முறையிட உள்ளதாகவும் அவர் தெரிவித்துள்ளார்.

தெலங்கானாவில் தற்போது காங்கிரஸ் ஆட்சி நடைபெறும் நிலையில், காவல் துறையின் இந்த செயல்பாடு அதிர்ச்சி அளிப்பதாக பல்வேறு தரப்பினரும் கூறியுள்ளனர். தாழ்த்தப்பட்ட வகுப்பை சேர்ந்தவர்கள் மீதான துன்புறுத்தலைத் தடுக்க ரோஹித் வெமுலா சட்டம் கொண்டுவரப்படும் என காங்கிரஸ் தனது தேர்தல் அறிக்கையில் வாக்குறுதி அளித்திருப்பது குறிப்பிடத்தக்கது.

இந்நிலையில், ரோஹித் வெமுலா தற்கொலை வழக்கில் மறு விசாரணை நடத்தப்படும் என்று தெலங்கானா மாநில காவல்துறை இயக்குநர் ரவி குப்தா உறுதியளித்துள்ளார். ரோஹித் வெமுலாவின் பெற்றோர் காவல்துறை அறிக்கை மீது சந்தேகம் எழுப்பியதை அடுத்து இந்த வழக்கில் மறுவிசாரணை நடத்த முடிவு செய்யப்பட்டிருப்பதாக அவர் கூறியுள்ளார். மறுவிசாரணைக்காக அனுமதி கேட்டு நீதிமன்றத்தில் மனுத் தாக்கல் செய்யப்படும் என்றும் டிஜிபி ரவி குப்தா தெரிவித்துள்ளார்.