புதுடில்லி: “கடந்த ஆண்டு அக்டோபர் மாதம் ஆந்திர பிரதேசத்தில் நிகழ்ந்த ரயில் விபத்துக்கு, ”லோகோ பைலட்டுகள் கிரிக்கெட் பார்த்துக் கொண்டிருந்தது தான் காரணம்” என மத்திய ரயில்வே துறை அமைச்சர் அஸ்வினி வைஷ்ணவ் தெரிவித்துள்ளார்.
கடந்த ஆண்டு அக்டோபர் மாதம் ஆந்திராவின் விஜயநகரத்தில் உள்ள கண்டகபள்ளி அருகே, விசாகப்பட்டினத்தில் இருந்து ராயகடா சென்ற பயணியர் ரயிலும், அதே வழித்தடத்தில் வந்த பாலசா பயணியர் ரயிலும், மோதி விபத்துக்கு உள்ளாகின. விபத்தில், ராயகடா பயணியர் ரயிலின் டிரைவர், அவரது உதவியாளர் உட்பட 14 பேர் உயிரிழந்துள்ளனர். மேலும் 50க்கும் மேற்பட்டோர் பலத்த காயம் அடைந்தனர்.
இது குறித்து அஸ்வினி வைஷ்ணவ் கூறியதாவது: சமீபத்தில் ஆந்திராவில் நடந்த ரயில் விபத்தின் போது, விபத்தில் சிக்கிய இரண்டு ரயில்களில் ஒன்றின் ஓட்டுநர் மற்றும் உதவி ஓட்டுநர் தங்கள் மொபைலில் கிரிக்கெட் போட்டியைப் பார்த்துக் கொண்டு, அலட்சியமாகச் செயல்பட்டதே விபத்திற்கு காரணம். இதனால் கவன சிதறல் ஏற்பட்டு விபத்து நேர்ந்துள்ளது.
ஓட்டுநர்கள் மற்றும் உதவி ஓட்டுநர்கள் ரயிலை இயக்குவதில் முழுமையாக கவனம் செலுத்துவதை உறுதி செய்கிறோம். ஒவ்வொரு சம்பவத்திலும் மூல காரணத்தை கண்டறிய முயற்சி செய்து, அது மீண்டும் நடக்காமல் இருக்க ஒரு தீர்வைக் கொண்டு வருகிறோம். இவ்வாறு அவர் கூறினார்.
