தேர்தல் வெற்றிக்கு பிறகு முழு பட்ஜெட்டை தாக்கல் செய்வோம்: மோடி

புது தில்லி: நாடாளுமன்ற தேர்தல் வெற்றிக்கு பிறகு முழு பட்ஜெட்டை பாஜக தாக்கல் செய்யும் என்று பிரதமர் நரேந்திர மோடி தெரிவித்தார்.

நாடாளுமன்ற பட்ஜெட் கூட்டத்தொடர் இன்று முதல் பிப்ரவரி 9-ஆம் தேதி வரை நடைபெறவுள்ளது. இன்று காலை கூட்டுக் கூட்டத்தில் குடியரசுத் தலைவா் திரெளபதி முா்மு உரையாற்றவுள்ளார்.

தொடர்ந்து, நாளை காலை 11 மணிக்கு இடைக்கால பட்ஜெட்டை நிதியமைச்சர் நிர்மலா சீதாராமன் தாக்கல் செய்யவுள்ளார்.

இந்த நிலையில், கூட்டத்தொடர் தொடங்குவதற்கு முன்னதாக, பிரதமர் நரேந்திர மோடி செய்தியாளர்களை சந்தித்துப் பேசினார்.

மோடி பேசியதாவது:

“புதிய நாடாளுமன்ற கட்டடத்தில் கூடிய முதல் கூட்டத்திலேயே மகளிருக்கான இடஒதுக்கீடு மசோதா நிறைவேற்றப்பட்டு மகத்தான சாதனை படைக்கப்பட்டது. குடியரசு நாள் அணிவகுப்பில் பெண்களின் பெருமை பறைசாற்றப்பட்டது.

நாடாளுமன்றத்தில் அமளியில் ஈடுபடுபவர்களை வரலாறு நினைவில் வைத்திருக்காது. கடைசி கூட்டத்தொடர் என்பதால், எதிர்க்கட்சியினர் புறக்கணிப்பு நடவடிக்கைகளில் ஈடுபட வேண்டாம்.” எனத் தெரிவித்தார்.

மேலும், நாடாளுமன்ற தேர்தலில் வெற்றிக்கு பிறகு நாங்கள் மீண்டும் முழு பட்ஜெட்டை தாக்கல் செய்வோம் என்று பிரதமர் மோடி குறிப்பிட்டார்.