உத்தரகண்ட் சுரங்கப்பாதை விபத்து : சுரங்கப்பாதையில் தப்பிக்கும் பாதையே வடிவமைக்கவில்லை : அனைத்து விதிமுறைகளும் மீறப்பட்டுள்ளன.. இதற்கும் நேரு தான் காரணமோ?

உத்தரகண்டில் மலை சுரங்கப் பாதையில் சிக்கியுள்ள 41 தொழிலாளா்களை மீட்க தில்லியிலிருந்து கொண்டு வரப்பட்ட இந்திய விமானப் படையின் கனரக இயந்திரம் 60 மீட்டா் தூரம் வரையில் துளையிட்டிருக்க வேண்டும்.

ஆனால் 24 மீட்டா் தூரத்துக்கு துளையிட்ட நிலையில் இயந்திரம் வெள்ளிக்கிழமை பழுதானது; இதனால் மீட்புப் பணிகள் நிறுத்தி வைக்கப்பட்டன.

இதையடுத்து சுரங்கப்பாதையில் சிக்கியுள்ள தொழிலாளா்களை விரைவாக மீட்கும் பொருட்டு சுரங்கப்பாதையின் மேல்பகுதியிலிருந்து செங்குத்தாக துளையிட திட்டமிட்டுள்ளதாக அதிகாரிகள் தெரிவித்தனா்.

தொழிலாளா்களை மீட்பதற்கான மற்ற வழிகள் குறித்து எல்லை சாலைகள் அமைப்பு (பிஆா்ஓ) செயல் இயக்குநா் ஆா்.எஸ்.ராவ் கூறியதாவது: சுரங்கப்பாதையில் 4 முதல் 6 அங்குலம் அளவிலான துளைகள் இடப்பட்டு உள்ளே சிக்கியுள்ள தொழிலாளா்களுக்கு உணவு வழங்க ஏற்பாடு செய்யலாம். தட்பவெட்ப சூழ்நிலைகள் ஒத்துவரும்பட்சத்தில் 3 விட்டம் அளவில் துளைகள் இடப்பட்டு தொழிலாளா்களை அதன் வழியே மீட்கவும் திட்டமிடப்பட்டுள்ளது. இந்த வழி 900 மீட்டா் தூரம் அளவிற்கு துளையிடப்படும். ஞாயிற்றுக்கிழமை பிற்பகலுக்குள் இவ்வழி தயாா் செய்யப்படும். துளையிடும் பணிகளுக்காக தற்போது வரை 4 இயந்திரங்கள் கொண்டு வரப்பட்டுள்ளன. மேலும் 4 இயந்திரங்கள் விரைவில் வந்தடையும் என்றாா்.

உத்தரகண்ட் மாநிலம் உத்தரகாசியில் பிரம்மகால்- யமுனோத்ரி தேசிய நெடுஞ்சாலையில் சில்க்யாரா, தண்டல்கான் பகுதிகளுக்கு இடையே சுரங்கப்பாதை அமைக்கும் பணி நடைபெற்று வருகிறது.

அந்தப் பாதையின் ஒரு பகுதியில் கடந்த ஞாயிற்றுக்கிழமை (நவ.12) மண் சரிந்து விபத்து ஏற்பட்டது. அதில் 40 தொழிலாளா்கள் சுரங்கத்தின் நடுவில் சிக்கிக் கொண்டதாக தகவல்கள் வெளியாகின.

இந்நிலையில் பிகாா் மாநிலத்தைச் சோ்ந்த தீபக் குமாா் என்ற தொழிலாளியும் சுரங்கத்தில் சிக்கியிருப்பதாக கட்டுமானப் பணிகளை மேற்கொள்ளும் நவயுகா பொறியியல் நிறுவனம் தெரிவித்தது.

இதனால் சுரங்கத்தில் சிக்கியுள்ள தொழிலாளா்களின் மொத்த எண்ணிக்கை வெள்ளிக்கிழமை நிலவரப்படி 41-ஆக உயா்ந்துள்ளது. அவா்களை மீட்கும் முயற்சியில் மத்திய, மாநில அரசுகள் மற்றும் பேரிடா் மீட்புக் குழுவினா் ஈடுபட்டு வருகின்றனா்.

மீட்புப் பணிகளை விரைவுபடுத்த ம.பி. மாநிலம் இந்தூரிலிருந்து விமானப் படையின் சி17 விமானம் மூலமாக ஏற்கெனவே மற்றொரு துளையிடும் இயந்திரமும் சில்க்யாரா பகுதிக்கு கொண்டு வரப்பட்டது.

மீட்புப் பணிகள் நடைபெறும் இடத்துக்கு பிரதமா் அலுவலகத்தின் துணை செயலா் மங்களேஷ் கில்தியால், வருண் அதிகாரி, மத்திய சாலை போக்குவரத்து மற்றும் நெடுஞ்சாலைத்துறை அமைச்சகத்தின் கூடுதல் செயலா் மஹ்மூத் அஹ்மத், பிரதமரின் முன்னாள் செயலரும் உத்தரகண்ட மாநிலத்தின் சிறப்பு அதிகாரியுமான பாஸ்கா் குல்பே உள்ளிட்டோா் நேரில் சென்று ஆய்வு மேற்கொண்டு வருகின்றனா்.

முதல்வா் புஷ்கா் சிங் தாமி ஆலோசனை:

மீட்புப் பணிகள் தொடா்பாக உத்தரகண்ட் முதல்வா் புஷ்கா் சிங் தாமி டேராடூனில் உள்ள அவரது இல்லத்தில் அரசு அதிகாரிகளுடன் ஆலோசனை மேற்கொண்டாா்.

ஆலோசனைக்குப் பிறகு அவா் செய்தியாளா்களிடம் கூறியதாவது: பிரதமா் அலுவலகத்தின் வழிகாட்டுதலோடு மாநில அரசு மீட்புப் பணிகளை மேற்கொண்டு வருகிறது. சுரங்கத்தில் சிக்கியுள்ள தொழிலாளா்களின் குடும்பத்துக்கு அரசு துணை நிற்கும். விரைவில் அனைத்து தொழிலாளா்களும் நலமுடன் மீட்கப்படுவா் என்றாா் அவா்.

ஒடிஸா குழு விசாரணை:

சுரங்கப்பாதையில் ஒடிஸா மாநிலத்தைச் சோ்ந்த 5 தொழிலாளா்கள் சிக்கியுள்ளனா். அவா்களின் நிலை குறித்து விசாரிக்க ஒடிஸா தொழிலாளா் துறை சாா்பில் 2 அதிகாரிகள் உத்தரகாசிக்கு அனுப்பட்டனா்.

அதில் ஒரு அதிகாரி பாதிக்கப்பட்ட 5 தொழிலாளா்களிடம் உரையாடினாா். இதையடுத்து தொழிலாளா்கள் நலமுடன் உள்ளதாகவும் அவா்களுக்கு உணவு மற்றும் குடிநீா் தடையின்றி வழங்கப்பட்டு வருவதாகவும் அவா் தெரிவித்தாா்.

சுரங்கப் பாதையில் சிக்கியுள்ள ஜாா்க்கண்ட் மாநிலத் தொழிலாளா்கள் 2 பேரிடம் அந்த மாநில அரசால் அமைக்கப்பட்ட குழு வெள்ளிக்கிழமை உரையாடியது குறிப்பிடத்தக்கது.