Last Updated:
நீதிபதி போல் நடித்து ஜாமீன் பெற முயன்ற சுகேஷ் சந்திரசேகருக்கு டெல்லி நீதிமன்றம் 8 ஆண்டுகள் சிறை தண்டனை விதித்தது.
உச்ச நீதிமன்ற நீதிபதி போல் நடித்து ஜாமீன் பெற முயற்சித்த இடைத்தரகர் சுகேஷ் சந்திரசேகருக்கு 8 ஆண்டுகள் சிறை தண்டனை வழங்கி டெல்லி நீதிமன்றம் தீர்ப்பளித்துள்ளது.
கடந்த 2017 ஆம் ஆண்டு ஊழல் வழக்கு ஒன்றில் சிறையில் இருந்தபோது, டெல்லி சிறப்பு நீதிபதி பூனம் சவுத்ரியை தொலைபேசியில் தொடர்புகொண்ட சுகேஷ், தன்னை உச்ச நீதிமன்ற நீதிபதி என அறிமுகம் செய்து கொண்டுள்ளார். பின்னர், சுகேஷுக்கு இடைக்கால ஜாமீன் வழங்க வேண்டும் என நீதிபதி போல் பேசி வலியுறுத்தியுள்ளார்.
பின்னர் அந்த நீதிபதி உச்ச நீதிமன்றத்தைத் தொடர்புகொண்டு விசாரித்தபோது, அத்தகைய அழைப்பை நீதிபதிகள் யாரும் மேற்கொள்ளவில்லை என்பது தெரியவந்தது. இந்த வழக்கில் சுகேஷ் சந்திரசேகரை குற்றவாளி என கடந்த ஆகஸ்ட் 20-ம் தேதி தீர்ப்பளித்த டெல்லி நீதிமன்றம் தற்போது தண்டனைகளை அறிவித்துள்ளது.
அதன்படி, அரசு ஊழியர் போல் ஆள்மாறாட்டம், அரசு ஊழியரை மிரட்டியது உள்ளிட்ட பிரிவுகளின் கீழ் மொத்தமாக 8 ஆண்டுகள் சிறைத் தண்டனை விதிக்கப்பட்டது. தண்டனைகளை ஒரே நேரத்தில் அனுபவிக்க வேண்டும் என்ற நீதிபதி, கருணை காட்ட வேண்டும் என்ற சுகேஷ் சந்திரசேகர் முன்வைத்த கோரிக்கையை நிராகரித்தார்.
