இந்த விதிகளை மீறினால் கடும் நடவடிக்கை… ஊழியர்களுக்கு எச்சரிக்கை விடுத்துள்ள இந்திய ரயில்வே…! | இந்தியா

ஊழியர்கள் சிலர் பணியில் இருக்கும்போது ரயில் செயல்பாடுகள், பராமரிப்பு, பாதுகாப்பு ஏற்பாடுகள் மற்றும் ரகசியமாக இருக்கக்கூடிய வளாகங்களின் வீடியோக்களை படம்பிடித்து பகிர்ந்து கொண்டதாகவும், இதனால் ரயில்வேயின் தொழில்முறை பிம்பம் சேதப்படுத்தப்படுவதாகவும், பாதுகாப்பு நெறிமுறைகளை மீறும் செயல்களாக அவை இருப்பதாகவும் ரயில்வே நிர்வாகம் கூறுகிறது.

தென்கிழக்கு ரயில்வே மண்டல நிர்வாகம் ரயில்வே ஊழியர்கள் பணியில் இருக்கும்போது அல்லது அதிகாரப்பூர்வ ரயில்வே வளாகத்திற்குள் இருக்கும்போது வீடியோ பதிவு செய்தல், வீடியோ உருவாக்கம் மற்றும் நேரடி ஒளிபரப்பு ஆகிய செயல்களில் ஈடுபட தடைவிதித்துள்ளது.

கொல்கத்தாவின் கார்டன் ரீச்சின் முதன்மை தலைமை செயல்பாட்டு மேலாளர் இது சார்பாக ஒரு உத்தரவைப் பிறப்பித்து, பணி நேரத்தில் இதுபோன்ற நடவடிக்கைகளில் ஊழியர்கள் ஈடுபடுவது சேவை நடத்தையை கடுமையாக மீறுவது மட்டுமல்லாமல், பாதுகாப்பு மற்றும் தனியுரிமைக்கு பெரும் அச்சுறுத்தலாகவும் இருப்பதாக குறிப்பிட்டுள்ளார்.

ஸ்டேஷன்கள், ஒர்க்‌ஷாப்ஸ், லோகோமோட்டிவ் கேபின்ஸ், கன்ட்ரோல் ரூம் மற்றும் அலுவலகங்கள் உள்ளிட்ட செயல்பாட்டுப் பகுதிகளில் வீடியோ ரெக்கார்ட் செய்வது ரயில்வே நடத்தை விதிகளை மீறுவதோடு, செயல்பாட்டுப் பாதுகாப்பு, ரகசியத் தன்மை மற்றும் ஒழுக்கத்திற்கும் ஆபத்தை விளைவிக்கக்கூடிய செயல்களாக இருப்பதாக தென்கிழக்கு ரயில்வே மண்டல நிர்வாக சுற்றறிக்கை கூறுகிறது.

மேலும், கட்டுப்பாட்டு அதிகாரிகள் மற்றும் மேற்பார்வையாளர்கள் சுற்றறிக்கையை ஊழியர்கள் கண்டிப்பாக பின்பற்றுவதை உறுதி செய்யவும், வழிகாட்டுதல்கள் குறித்து ஊழியர்களுக்கு கற்பிக்கவும் அறிவுறுத்தப்பட்டு உள்ளனர்.