நாடு முழுவதும் அறிமுகமான இ-பாஸ்போர்ட்கள்…! பழைய பாஸ்போர்ட்டுக்கும், இ-பாஸ்போர்ட்களுக்கும் இடையே உள்ள வேறுபாடு என்ன…? | இந்தியா

புதிய இ-பாஸ்போர்ட்கள் பார்ப்பதற்கு பழைய பாஸ்போர்ட்களை போலவே இருந்தாலும், கவரில் கொடுக்கப்பட்டிருக்கும் அசோகா சின்னத்திற்கு கீழே இப்போது ஒரு சிப் உள்ளது. இந்த சிப்பில் பாஸ்போர்ட் வைத்திருப்பவர் தொடர்பான அனைத்து தகவல்களும் சேமிக்கப்படுகின்றன. எனவே, இந்த இ-பாஸ்போர்ட்கள், போலி பாஸ்போர்ட்களின் பயன்பாட்டை தடுக்கும். மேலும், விமான நிலையங்களில் இமிகிரேஷன் நடைமுறைகளையும் விரைவாக செய்து முடிக்க உதவும்.

மத்திய வெளியுறவு அமைச்சகத்தின் தூதரகம், பாஸ்போர்ட் மற்றும் விசா பிரிவின் செயலாளர் அருண் குமார் சாட்டர்ஜி இது குறித்து பேசுகையில், புதிய இ-பாஸ்போர்ட்கள் வசதியானவை, பாதுகாப்பானவை, விமான நிலையங்களில் பயணிகளின் நேரத்தை மிச்சப்படுத்துகின்றன மற்றும் சர்வதேச விமான விதிமுறைகளுக்கு இணங்குகின்றன என்று குறிப்பிட்டுள்ளார். முக்கியமாக இ-பாஸ்போர்ட் வைத்திருப்பவர்கள் இனி விமான நிலைய இமிகிரேஷன் கவுன்டர்களில் சரிபார்ப்புக்காக நீண்ட நேரம் செலவிட வேண்டியதில்லை.

இதுவரை, இந்தியா முழுவதும் சுமார் 80 லட்சம் இ-பாஸ்போர்ட்டுகள் வழங்கப்பட்டுள்ளன. இவற்றில் 60,000 இ-பாஸ்போர்ட்டுகள் வெளிநாடுகளில் உள்ள இந்திய தூதரகங்களால் வழங்கப்பட்டுள்ளன. பாஸ்போர்ட் செயல்முறையை மேலும் அணுகக்கூடியதாக மாற்ற, ஒவ்வொரு மக்களவைத் தொகுதியிலும் பாஸ்போர்ட் சேவா கேந்திர மையங்களை அமைச்சகம் திறந்துள்ளது.