“ஹைட்ரஜன் குண்டு என்ற ராகுல்காந்தியின் கூற்று முட்டாள்தனமானது” பாஜகவினர் கண்டனம்! | இந்தியா

பிஹாரில் இந்த ஆண்டு இறுதியில் சட்டப்பேரவைத் தேர்தல் நடைபெற உள்ளது. இதை முன்னிட்டு, தேர்தல் ஆணையம் சார்பில் வாக்காளர் பட்டியல் சிறப்பு தீவிர திருத்தம் மேற்கொள்ளப்பட்டு வருகிறது. இதற்கு, காங்கிரஸ் உள்ளிட்ட எதிர்க்கட்சிகள் கடும் எதிர்ப்பு தெரிவித்து வருகின்றன. சிறப்பு தீவிர திருத்தத்தின் மூலம் உயிரிழந்தவர்கள், முகவரி மாறியவர்கள், இரண்டுமுறை பதிவு பெற்றுள்ளவர்கள், மாநிலத்தைவிட்டு வெளியேறிவிட்டவர்கள், இந்தியர் என்பதற்கான உரிய ஆவணங்கள் இல்லாதவர்கள் என சுமார் 65 லட்சம் பேர் வாக்காளர் பட்டியலில் இருந்து நீக்கப்பட்டுள்ளதாக தேர்தல் ஆணையம் தெரிவித்தது.

இதற்கு கடும் கண்டனம் தெரிவித்துள்ள எதிர்க்கட்சிகள், வாக்களிக்க தகுதி பெற்றவர்களை பட்டியலில் இருந்து தேர்தல் ஆணையம் நீக்கியுள்ளதாகவும், பாஜகவுடன் இணைந்து தேர்தல் ஆணையம் செயல்படுவதாகவும் குற்றம் சாட்டின. இந்நிலையில், இந்த விவகாரம் தொடர்பாக வாக்காளர்களிடையே விழிப்புணர்வை ஏற்படுத்தும் நோக்கில் காங்கிரஸ் மூத்த தலைவரும், மக்களவை எதிர்க்கட்சித் தலைவருமான ராகுல் காந்தி கடந்த ஆகஸ்ட் 17-ம் தேதி பிஹாரின் சாசராமில் விழிப்புணர்வு பயணத்தைத் தொடங்கினார்.

இதன் இறுதி நிகழ்ச்சி தலைநகர் பாட்னாவில் இன்று (செப்.1) நடைபெற்றது. இந்தக் கூட்டத்தில் உரையாற்றிய ராகுல் காந்தி, பாஜகவினருக்கு நான் ஒன்றை சொல்லிக் கொள்ள விரும்புகிறேன். அணுகுண்டைவிட பெரிய ஒன்றை நீங்கள் கேள்விப்பட்டிருக்கிறீர்களா? அது ஹைட்ரஜன் குண்டு. பாஜகவினரே, நீங்கள் தயாராக இருங்கள். ஒரு ஹைட்ரஜன் குண்டு வர இருக்கிறது. விரைவில் வாக்குத் திருட்டின் உண்மையை மக்கள் கண்டுபிடிப்பார்கள். அப்போது, பிரதமர் மோடி நாட்டு மக்கள் முன் தனது முகத்தை காட்ட முடியாது. இது உறுதி. என தெரிவித்தார்.

இதற்கு கண்டனம் தெரிவித்த பாஜக தலைவரும் முன்னாள் மத்திய அமைச்சருமான ரவிசங்கர் பிரசாத், ராகுல் காந்தியின் கூற்று நாட்டு மக்களை அவமதிப்பதாக உள்ளது என தெரிவித்தார்.

மேலும், “ராகுல் காந்தி அரசியலமைப்பையோ அல்லது சட்டத்தையோ புரிந்து கொள்ளவில்லை. 2014 முதல், மோடியின் அனைத்து வெற்றிகளும் போலியானவை என்று அவர் கூறி வருகிறார் – இது இந்த நாட்டின் மக்களுக்கும் வாக்காளர்களுக்கும் ஒரு அவமானம். அவர் ஒரு வெடிகுண்டைக் கொண்டுவருவது பற்றிப் பேசுகிறார், ஆனால் அது ஒரு முட்டாள்தனமாக மாறிவிடும். ராகுல் காந்தியின் அறிக்கைகளை நான் கடுமையாகக் கண்டிக்கிறேன்,” என்று பிரசாத் மேலும் கூறினார்.

அதே போல், பாஜக தலைவரும் டெல்லி அமைச்சருமான மஞ்சிந்தர் சிங் சிர்சா ஹைட்ரஜன் குண்டு இப்படித்தான் இருக்குமா என்று கேள்வி எழுப்பினார். மேலும், காங்கிரஸ் தோற்றார்கள் என்றால் அவர்கள் என்ன செய்திருக்க வேண்டும் , மக்கள் முன் தோல்வியை ஏற்றுக்கொண்டு – ‘ஆம், நீங்கள் எங்களை தோற்கடித்தீர்கள், எந்த பிரச்சனையும் இல்லை, நாங்கள் கடினமாக உழைத்து மீண்டும் உங்களிடம் வருவோம்’ என்று கூறுவதுதான் சரியானது. ஆனால் அதற்கு பதிலாக, அவர்கள் நீதிமன்றங்களை இதில் இழுக்க விரும்புகிறார்கள். கர்நாடகாவில் வாக்கு மோசடி நடந்திருந்தால், உங்கள் அரசாங்கம் அங்கு எவ்வாறு ஆட்சிக்கு வந்தது? இமாச்சலத்தில் அவர்கள் எவ்வாறு அரசாங்கத்தை அமைத்தார்கள்?” என்று கேள்வி எழுப்பினார்.