“முதல் முறையாக வாக்களிக்கப் போகும் 124 வயது மிந்தா தேவி” – இந்தியா கூட்டணி எம்.பி.க்கள் போராட்டம் | இந்தியா

நாடாளுமன்றத்தில், இந்தியா கூட்டணி எம்.பி.க்கள் பலரும், ஒரு பெண்ணின் புகைப்படத்துடன் ‘மிந்தா தேவி’ எனும் பெயர் பொறித்த டி-ஷர்ட்டை அணிந்து போராட்டம் நடத்தினர். மேலும், அவர்களின் டி-ஷர்ட்டின் பின் பக்கத்தில் ‘124 நாட் அவுட்’ எனும் பொறிக்கப்பட்டிருந்தது.

இந்த வருட இறுதியில் நடைபெற இருக்கும் பிகார் சட்டமன்றத் தேர்தலுக்கு முன்பாக தேர்தல் ஆணையம் அங்கு சிறப்பு தீவிர வாக்காளர் பட்டியல் திருத்தப் பணியை மேற்கொண்டுள்ளது. இதில், சுமார் 65 லட்சம் நபர்களின் பெயர்கள் நீக்கப்பட்டுள்ளன. இதில், குடிபெயர்ந்தவர்கள், இரு இடங்களில் வாக்கு வைத்திருந்தவர்கள், மரணித்தவர்கள் உள்ளிட்டோர் இருக்கின்றனர்.

நீக்கத்திற்குப் பின் தேர்தல் ஆணையம் வரைவு வாக்காளர் பட்டியலை வெளியிட்டது. அதில், மிந்தா தேவி எனும் பெண்ணுக்கு 124 வயது என்று குறிப்பிடப்பட்டுள்ளது. இதனை கையில் எடுத்த எதிர்க்கட்சி எம்.பி.க்கள், அவரது பெயர், வயது பொறித்த டி-ஷர்ட்டை அணிந்து போராட்டம் நடத்தினர்.

போராட்டம் குறித்துப் பேசிய காங்கிரஸ் எம்.பி. மாணிக்கம் தாகூர், “ராஜீவ் குமார், ஞானேஷ் குமார் ஆகியோர் கீழ் இருக்கும் இந்திய தேர்தல் ஆணையம் பாஜகவின் துறையாக மாறிவிட்டது. இது அதன் தோல்வியைக் காட்டுகிறது. இதற்கான உதாரணம் தான், முதல் முறையாக வாக்களிக்க இருக்கும் 124 வயது மிந்தா தேவி” எனத் தெரிவித்துள்ளார்.