‘குற்றம் 23’ திரைப்படத்தையே விஞ்சும் சம்பவம்.. டிஎன்ஏ டெஸ்ட் மூலம் அம்பலமான அதிர்ச்சி தகவல்!

தெலங்கானா மாநிலம் செகந்திராபாத்தில் டாக்டர் நர்மதா என்பவர், ஷ்ருஷ்டி ஃபெர்டிலிட்டி சென்டர் என்ற பெயரில் செயற்கை கருத்தரிப்பு மையம் ஒன்றை நடத்தி வருகிறார். அண்மையில், ராஜஸ்தானை சேர்ந்த தம்பதி, திருமணமாகி ஆண்டுகள் பல கடந்தபோதும் குழந்தை பாக்கியம் இல்லை எனக் கூறி, இந்த கருத்தரிப்பு மையத்துக்கு வந்தனர். அப்போது, செயற்கை கருத்தரிப்பு மூலம் குழந்தை பெற்றுக்கொள்ள மருத்துவர் நர்மதாவை அணுகியுள்ளனர். அவர்களுக்கு மருத்துவமனையில் மேற்கொண்ட சிகிச்சையில் செயற்கை கருத்தரிப்பு முறையில் குழந்தையும் பிறந்துள்ளது.

இந்நிலையில் கருத்தரிப்பு மையத்தின் செயல்பாடுகள் மீது அந்த தம்பதிக்கு திடீரென சந்தேகம் எழுந்துள்ளது. பின்னர், தங்களுக்கு பிறந்ததாக கூறப்பட்ட குழந்தைக்கு மரபணு சோதனை நடத்த டாக்டர் நர்மதாவிடம் கேட்டுக்கொண்டனர். ஆனால், குழந்தைக்கு மரபணு சோதனை நடத்தாமல் மருத்துவர் தவிர்த்து வந்துள்ளார். இதையடுத்து சொந்த ஊர் சென்ற தம்பதி, டெல்லியில் உள்ள மருத்துவமனையில் குழந்தைக்கு மரபணு சோதனை மேற்கொண்டுள்ளனர்.

அதில், குழந்தையின் மரபணு வேறு ஒருவருடையது என்பதை அறிந்து அதிர்ச்சியடைந்துள்ளனர். உடனே செகந்திராபாத்திற்கு வந்த தம்பதி அங்குள்ள கோபாலபுரம் காவல் நிலையத்தில் டாக்டர் நர்மதாவுக்கு எதிராக புகார் அளித்தனர். புகாரின்பேரில் வழக்குப்பதிவு செய்த போலீசார், ஷ்ருஷ்டி கருத்தரிப்பு மையத்தில் அதிகாலை இரண்டு மணியளவில் அதிரடி சோதனையில் ஈடுபட்டனர்.

அப்போது அங்கு பெண்ணின் கருமுட்டை, ஆணின் உயிரணுவை உறைந்த நிலையில் இருப்பு வைக்கப்பட்டிருந்தது கண்டுபிடிக்கப்பட்டது. அத்துடன், பல்வேறு ஆவணங்களையும் கைப்பற்றினர். அதை ஆய்வு செய்ததில் கருத்தரிப்பு மையம் என்ற பெயரில் பெண் மருத்துவர் பெரும் மோசடியில் ஈடுபட்டது தெரியவந்தது. இந்த மையத்தில் இருந்து கருமுட்டை, ஆணின் உயிரணுவை சேகரித்து நாடு முழுவதும் விற்று கோடிகளில் புரண்டது அம்பலமானது.

டெஸ்ட் டியூப் பேபிக்காக வத்த தம்பதியிடம், கணவனின் உயிரணுவுக்குப் பதில் வேறு ஒருவரின் உயிரணுவை செலுத்தி மோசடி செய்ததும் கண்டுபிடிக்கப்பட்டது. மேலும், ஐதராபாத்தைச் சேர்ந்த தம்பதியிடம் 35 லட்சம் ரூபாய் வாங்கிக் கொண்டு குழந்தை ஒன்றை, மருத்துவர் நர்மதா விற்பனை செய்த அதிர்ச்சியூட்டும் தகவலும் வெளியானது. இதற்காக, குழந்தைகளை விற்பனை செய்ய பல புரோக்கர்கள் நர்மதாவின் கீழ் செயல்பட்டு வந்ததும் கண்டுபிடிக்கப்பட்டு உள்ளது.

டாக்டர் நர்மதா முறையான அனுமதியின்றி செயல்படும் இந்தியன் ஸ்பேர்ம் டெக் என்ற நிறுவனத்துடன் கைகோர்த்து தில்லாலங்கடி வேலையில் ஈடுபட்டுள்ளார். இவர், ஐதராபாத், விசாகப்பட்டினம், விஜயவாடா உட்பட பல்வேறு நகரங்களிலும் செயற்கை கருத்தரிப்பு மையங்களை நடத்தி, மெகா மோசடியில் ஈடுபட்டதும் தெரியவந்துள்ளது. இதையடுத்து, மருத்துவர் நர்மதா, அவருடைய மேலாளர் உட்பட 8 பேர் மீது போலீசார் வழக்குபதிவு செய்தனர்.

மேலும், தங்களுக்கு பிறக்கும் குழந்தைக்கு டிஎன்ஏ பரிசோதனை கட்டாயம் நடத்த வேண்டும் என்றும், முன்னதாகவே சம்பந்தப்பட்ட டாக்டர்களிடம் தெரிவிக்கவும் கேட்டுக்கொள்ளப்பட்டு உள்ளது. ஐதராபாத்தில் கருத்தரிப்பு மையம் என்ற பெயரில் கருமுட்டை மற்றும் ஆணின் உயிரணுவை விற்பனை செய்து, மெகா மோசடியில் ஈடுபட்ட சம்பவம் பெரும் அதிர்வலையை ஏற்படுத்தியுள்ளது.