இறங்கி அடிக்கும் “ரெட் டீமிங்” – ஆபரேஷன் சிந்தூரில் இந்திய ராணுவம் கையாண்ட புதிய போர் வியூகம்..!

ஜம்மு-காஷ்மீரின் பஹல்காம் சுற்றுலா தளத்தில், பயங்கரவாதிகளால் 26 பேர் கண்மூடித்தனமாக சுட்டுக் கொல்லப்பட்டனர். இதற்கு பதிலடியாக பாகிஸ்தானில் செயல்பட்டுக்கொண்டிருந்த பயங்கரவாத முகாம்களின் மீது ஆபரேஷன் சிந்தூர் என்ற பெயரில் இந்தியா ராணுவம் தாக்குதல் நடத்தியது. இதில் நூற்றுக்கும் மேற்பட்ட பயங்கரவாதிகள் கொல்லப்பட்டதாக கூறப்படுகிறது. இந்த தாக்குதலின் போது, இந்திய ராணுவம், முதல் முறையாக “ரெட் டீமிங்” என்ற வியூகத்தை பயன்படுத்தியதாக தகவல் வெளியாகியுள்ளது.

ரெட் டீமிங் என்பது எதிரியின் மனநிலை, தந்திரங்கள் மற்றும் எதிர்வினை முறைகளை நன்கு அறிந்த ஒரு சிறிய நிபுணர் குழுவைக் கொண்டு திட்டமிடுவதாகும். உண்மையான தாக்குதல்களைப் போன்று உருவகப்படுத்தி, எதிரிகள் எவ்வாறு செயல்படுகின்றனர், அவர்களின் பலவீனங்கள் என்ன என்பதை கண்டறிவதே ரெட் டீமிங் குழுவின் முக்கிய பணியாகும். ரெட் டீமிங் குழு, எதிரிகளின் தந்திரங்களை உருவகப்படுத்தி, blue team எனப்படும் தற்காப்புப் படைக்கு எதிராக கற்பனையான தாக்குதல்களை நடத்தும்.

மேலும் எதிரிகளின் மீது பயன்படுத்தப்பட உள்ள ராணுவ தளவாடங்களையும் அவற்றின் தயார் நிலையையும் ரெட் டீமிங் குழு சோதிக்கும். இக்குழுவில், நாட்டின் பல்வேறு பகுதிகளைச் சேர்ந்த மிக முக்கிய 5 மூத்த உறுப்பினர்கள் இடம் பெறுவார்கள். பனிப்போர் காலத்தில் சோவியத் யூனியனுக்கு எதிராக பல நாடுகள் இந்த வியூகத்தை பயன்படுத்தி உள்ளன.

இந்தியாவில் இந்த வியூகம் விதுர் வக்தா (Vidur Vakta) என்றழைக்கப்படுகிறது. மகாபாரதத்தில் வரும் விதுரன் கதாபாத்திரத்தின் அடிப்படையில் இதற்கு பெயர் வைக்கப்பட்டுள்ளது. விதுரன் பாண்டவர்களுக்கும் கௌரவர்களுக்கும் ஆலோசகராக இருந்ததாக கூறப்படுகிறது. 2024 அக்டோபரில் நடந்த ராணுவத் தளபதிகள் மாநாட்டில் ரெட் டீமிங்-கை உருவாக்க தீர்மானிக்கப்பட்டதாக தகவல்களை தெரிவிக்கின்றன. பின்னர் 15 அதிகாரிகள் கொண்ட குழு ரெட் டீமிங்கில் சிறப்புப் பயிற்சி பெற்றது.

இந்திய ராணுவத்தில் ஏற்கனவே red forces குழு உள்ளது. இதன் தலைமையகம் சிம்லாவில் அமைந்துள்ளது. red forces குழுவினர் காகிதம் மற்றும் மணல் மாடல்களை உருவாக்கி, அதில் போர் பயிற்சி பெறுகிறார்கள். red forces எதிரியின் தந்திரங்களை உருவகப்படுத்தி பயிற்சிக்கு பயன்படுத்தப்படும் ஒரு கருவியாக இருந்தாலும், ரெட் டீமிங் சொந்த திட்டங்களையும் எதிரியின் மீதான அவற்றின் தாக்கத்தையும், ஆய்வு செய்து தாக்கும் திறன் கொண்டது.