சிந்து நதிநீர் நிறுத்தம் முதல் ராணுவ ஆப்ரேஷன் வரை.. பாகிஸ்தானை பணிய வைத்த இந்தியா.. அரசுக்கு குவியும் பாராட்டு

இன்று மாலை முதல் தாக்குதல் நிறுத்தப்பட்டிருந்தாலும் இந்தியா பதிலடி கொடுத்த 3 ஆவது நாளிலேயே பாகிஸ்தான் அடங்கி விட்டதாக சர்வதேச விமர்சகர்கள் கருத்து தெரிவித்துள்ளார்கள்.

ராணுவ முறையில்..

இந்தியா தனது ஒருமைப்பாட்டை காப்பதற்கு ராணுவ நடவடிக்கை மேற்கொண்டது தவிர்க்க முடியாததாகும். துல்லியமான ஏவுகனைத் தாக்குதல், பாகிஸ்தானில் பஹாவல்பூர், முரிட்கே உள்பட 4 இடங்கள், பாகிஸ்தான் ஆக்ரமிப்பு காஷ்மீரில் 5 இடங்கள் என அதிரடி தாக்குதலை பாகிஸ்தான் சுதாரிக்கும் முன் இந்தியா நடத்தி முடித்தது.

மே 7,8 மற்றும் 9 ஆகிய தேதிகளில் பாகிஸ்தானின் பழிவாங்கும் ட்ரோன் மற்றும் ஏவுகணைத் தாக்குதல்களுக்கு பதிலளிக்கும் விதமாக, பல இந்திய நகரங்கள் மற்றும் இராணுவ நிலைகளை குறிவைத்து, நாடு முழுவதும் உள்ள பாகிஸ்தானிய வான் பாதுகாப்புகளை அழிக்க இந்தியா காமிகேஸ் ட்ரோன்களை ஏவியது.

இந்தியாவின் வான் பாதுகாப்பு அமைப்பு பாகிஸ்தானின் அனைத்து ஏவுகணை தாக்குதல்களையும் ஒன்றுமில்லாமல் ஆக்கியது. இதனால் இந்தியாவுக்கு அதிக உயிரிழப்பும் ஏற்படவில்லை

எல்லைக் கட்டுப்பாட்டுக் கோடு பகுதியில், பொதுமக்கள் பகுதிகளை குறிவைத்து பூஞ்ச்-ரஜோரி பகுதியில் பாகிஸ்தான் பீரங்கி மற்றும் மோட்டார் ஷெல் தாக்குதல்களை நடத்தியது. இதையடுத்து இந்திய படைகள் அதிரடி தாக்குதல் நடத்தி, பாகிஸ்தான் ராணுவ பதுங்கு குழிகளை துவம்சம் செய்தது.

ராணுவம் அல்லாத நடவடிக்கை

பாகிஸ்தான் அத்துமீறிய நாளில் இருந்து சர்வதேசங்களின் ஆதரவை பெற்றது இந்தியா. அந்நாட்டை பொருளாதார ரீதியாகவும், ராஜ தந்திர ரீதியாகவும் தனிமைப்படுத்துவதற்கும் இந்தியா மேற்கொண்ட முயற்சிகள் அனைத்தும் வெற்றி பெற்றன.

சிந்து நீர் ஒப்பந்தத்தை இந்தியா நிறுத்தி வைத்தது பாகிஸ்தான் பணிந்ததற்கான முக்கிய காரணங்களில் ஒன்றாக பார்க்கப்படுகிறது. தொடக்கத்தில் இந்த நடவடிக்கைக்கு விமர்சனங்கள் கிளம்பினாலும் அடுத்தடுத்த நாட்களில் மத்திய அரசுக்கு பாராட்டுகள் குவிந்தன.

நதிக்கரையோரப் பகுதியான பாகிஸ்தான், அதன் 16 மில்லியன் ஹெக்டேர் விவசாய நிலங்களில் 80% மற்றும் அதன் மொத்த நீர் பயன்பாட்டில் 93% சிந்து நதி அமைப்பைச் சார்ந்துள்ளது. சிந்து நதிநீர் ஒப்பந்தத்தை இந்தியா நிறுத்தியதால் பாகிஸ்தானின் உள்நாட்டு உற்பத்தியில் 25 சதவீதம் வரை குறைவு ஏற்படும்.

இந்தியா அட்டாரி-வாகா எல்லையை மூடி பாகிஸ்தானுடனான அனைத்து இருதரப்பு வர்த்தகத்தையும் நிறுத்தி வைத்தது, வெங்காயம் போன்ற முக்கிய பொருட்களின் ஏற்றுமதியை நிறுத்தியது மற்றும் சிமென்ட் மற்றும் ஜவுளி போன்ற இறக்குமதிகளைக் கட்டுப்படுத்தியது. இந்த முடிவு இரு நாடுகளுக்கும் இடையிலான முதன்மை நில அடிப்படையிலான வர்த்தக வழியைத் துண்டித்ததுடன் பாகிஸ்தானின் பொருளாதாரத்திற்கு பேரிடியாக அமைந்தது.

ஏற்கனவே பாகிஸ்தான் நாடு பணவீக்கம், மற்றும் கடனுடன் போராடி வருகிறது. இந்த சூழலில் தொடக்கத்திலேயே  நேரடி இராணுவ நடவடிக்கைகளில் ஈடுபடாமல் இந்த பொருளாதார கட்டுப்பாடுகளை கொடுத்ததன் மூலம், இந்தியா போர் தொடங்கும் முன்னரே வெல்ல ஆரம்பித்தது.

பஹல்காம் பயங்கரவாத தாக்குதலுக்குப் பிறகு உடனடியாக பயங்கரவாதத்திற்கு எதிரான வலுவான உறுதியைக் காட்டும் வகையில் இந்தியாவில் வசிக்கும் அனைத்து பாகிஸ்தானியர்களின் விசாவையும் இந்தியா ரத்து செய்து அவர்களை திருப்பி அனுப்பியது.

பாகிஸ்தான் கலைஞர்கள் மீது இந்தியா முழுமையான தடை விதித்தது, நிகழ்ச்சிகள், திரையிடல்கள், இசை வெளியீடுகள் மற்றும் கலாச்சார ஒத்துழைப்புகளை நிறுத்தியது. இந்தத் தடை ஸ்ட்ரீமிங் தளங்களுக்கும் நீட்டிக்கப்பட்டது, இந்தியாவில் பாகிஸ்தானின் கலாச்சார செல்வாக்கைத் துண்டித்தது.

இவ்வாறு ராணுவம் மற்றும் ராணுவம் அல்லாத நடவடிக்கைகள் மூலம் பாகிஸ்தானுக்கு தக்க பாடத்தை இந்தியா கற்றுக் கொடுத்துள்ளதாக சர்வதேச வல்லுனர்கள் பாராட்டு தெரிவிக்கின்றனர்.