பல ஆண்டுகளாக இருளில் தவித்த 8 குடும்பங்கள்.. இறுதியாக கிடைத்த மின்சாரம்.. நடனமாடி மகிழ்ந்த பழங்குடியினர்!

சமலம்மா மலையின் உச்சியில் அமைந்துள்ள ஜீலுகுலோவாவில் எட்டு குடும்பங்கள் மட்டுமேANDR வசித்து வருகின்றனர். இந்த 8 குடும்பங்களில் மொத்தமாக 50 பேர் உள்ளனர். அந்த கிராமத்தில் இதுவரை, மின்சாரம் என்பதே கிடையாது. இதனால், இந்த மக்கள் சூரிய அஸ்தமனத்திற்குப் பிறகு அடர்ந்த காடுகள் மற்றும் காட்டு விலங்குகளுக்கு மத்தியில் இருளில் வாழ்ந்து வந்துள்ளனர். எவ்வித அடிப்படை வசதிகளும் இல்லாமல் இங்குள்ள கிராம மக்கள் மெழுகுவர்த்திகளைப் பயன்படுத்தி சாப்பிடுவது உள்ளிட்ட பணிகளையும், தங்கள் தொலைபேசிகளை சார்ஜ் செய்ய பங்காரு பந்தலுவுக்கு 7 கி.மீ தூரம் நடந்தே சென்று வந்துள்ளனர். யாராவது நோய்வாய்ப்பட்டாலோ அல்லது பாம்பு கடித்தாலோ மருத்துவமனைக்குச் செல்லக் கூட சிரமங்களைச் சந்தித்து வந்துள்ளனர்.

அடிப்படை உள்கட்டமைப்பிற்காக பல போராட்டங்கள் மற்றும் முறையீடுகள் செய்தனர். கடந்த 2022-ல் தேசிய மனித உரிமைகள் ஆணையத் தலைவர் மற்றும் அனகப்பள்ளி ஆட்சியர் வருகையின் போதும் இதுகுறித்து கோரிக்கைகளை கிராம மக்கள் வைத்தனர். இதனையடுத்து அவர்களின் நீண்ட காத்திருப்பு இறுதியாக முடிவுக்கு வந்தது. அனகப்பள்ளி ஆட்சியர், மின்சாரம், தண்ணீர் மற்றும் சாலைகள் வழங்குவதாக கிராம மக்களுக்கு வாக்குறுதி அளித்தார். இதனையடுத்து ஆதார் மற்றும் ரேஷன் கார்டுகள் வழங்கப்பட்டன. ஆனால், இதற்கான பணிகள் ஆமை வேகத்திலேயே நடந்ததாகக் கூறப்படுகிறது.

இந்த நிலையில் கடந்த ஞாயிற்றுக்கிழமை ஜன்மன் திட்டத்தின் கீழ், ஜீலுகுலோவா கிராமத்திற்கு மின்சாரம் வந்தடைந்தது. இதனால் மின் விளக்குகள் எரியத் தொடங்கியது. நீண்ட நாள் கோரிக்கை நிறைவேறியதையடுத்து அங்குள்ள கிராம மக்கள் மகிழ்ச்சியை நடனமாடி கொண்டாடினர். பாரம்பரிய திம்சா நடனமாடி மகிழ்ந்த கிராமத்தினரின் வீடியோ காட்சிகள் தற்போது சமூக வலைத்தளங்களில் வைரலாகி வருகிறது. குறிப்பாக தங்கள் கோரிக்கைகளுக்குச் செவிசாய்த்த அனகப்பள்ளி மாவட்ட ஆட்சியர் மற்றும் மின்சாரத் துறை பொறியாளர்கள் உள்ளிட்ட பலருக்கும் கிராம மக்கள் நன்றி தெரிவித்தனர். இதுகுறித்துப் பேசிய கிராம மக்கள் மின்சாரம் கிராமத்திற்கு வந்தடைந்தது ஒரு பெரிய வெற்றி என்று கூறினர். ஆனால், இன்னும் சாலை மற்றும் குடிநீர் வசதிக்காகக் காத்திருக்க வேண்டிய நிலை உள்ளதாக வருத்தத்துடன் கூறினர்.