அருணாசல பிரதேசத்தில் காங்கிரஸ் மற்றும் என்பிபி கட்சியை சேர்ந்த 4 எம்எல்ஏக்கள் இன்று பாஜகவில் இணைந்தனர். அம்மாநிலத்தில் இந்த ஆண்டிலேயே சட்டப்பேரவை மற்றும் மக்களவைக்கு ஒரே நேரத்தில் தேர்தல் நடைபெறவுள்ளது.
கடந்த 2019 அருணாச்சல பிரதேசத்தில் நடந்த சட்டப்பேரவைத் தேர்தலில் பாஜக 41 இடங்களை கைப்பற்றி ஆட்சியைப் பிடித்தது. ஜனதா தளம் 7 தொகுதிகளிலும், என்பிபி கட்சி 5 தொகுதிகளிலும், காங்கிரஸ் 4 தொகுதிகளிலும், இதர 3 இடங்களிலும் வெற்றிருந்தன. இதனைத் தொடர்ந்து வடகிழக்கு மாநிலமான அருணாசலில் முதல்வர் பெமா காண்டு தலைமையில் பாஜக ஆட்சி நடைபெற்று வருகிறது.
அருணாச்சல பிரதேசம் பாஜகவில் இணைந்த எம்எல்ஏக்கள்
இந்த நிலையில் அருணாசலில் காங்கிரஸ் மற்றும் தேசிய மக்கள் கட்சியைச் சேர்ந்த தலா இரண்டு எம்எல்ஏக்கள் என மொத்தம் 4 பேர் இன்று பாஜகவில் இணைந்தனர். இந்த நிகழ்ச்சியில் முதல்வர் பெமா காண்டு, மாநில பாஜக தலைவர் பியூராம் வாகே ஆகியோர் கலந்து கொண்டனர். மாநிலத்தில் விரைவில் தேர்தல் நடைபெற உள்ள நிலையில் 4 எம்எல்ஏக்கள் பாஜகவில் இணைந்திருப்பது அக்கட்சிக்கு மேலும் வலுசேர்க்கும் என எதிர்பார்க்கப்படுகிறது.
பாஜக
ஏற்கெனவே ஜேடியு, காங்கிரஸ் உட்பட பல கட்சி எம்எல்ஏக்களும் அடுத்தடுத்து பாஜகவில் இணைந்த நிலையில் அருணாச்சல பிரதேசத்தில் மொத்தம் உள்ள 60 இடங்களில் பாஜக எம்எல்ஏக்களின் பலம் 56 ஆக உயர்ந்துள்ளது. பாஜகவுக்கு எதிராக தற்போது 4 எம்எல்ஏக்கள் மட்டுமே உள்ளனர் என்பது குறிப்பிடத்தக்கது. அவர்களையும் எப்படி தூக்குவது என உள்ளூர் பாஜக தலைவர்கள் வியூகம் வகுத்து வருகின்றனர்.
