தேமுதிக மாவட்ட செயலாளர்கள் கூட்டம் சென்னை கோயம்பேட்டில் உள்ள கட்சி தலைமை அலுவலகத்தில் இன்று நடைபெற்றது. இதில் நாடாளுமன்ற தேர்தல் கூட்டணி தொடர்பாக முடிவெடுக்க பிரமேலதா விஜயகாந்துக்கு அனைத்து அதிகாரமும் வழங்குவது உட்பட 10 தீர்மானங்கள் நிறைவேற்றப்பட்டன.
இதனை தொடர்ந்து கட்சி தலைமை அலுவலகத்தில் பிரேமலதா விஜயகாந்த் செய்தியாளர்களை சந்தித்தார். அப்போது, கூகுளில் கேப்டன் விஜயகாந்தின் நினைவிடம் கேப்டன் டெம்பிள் என வருவதாக கூறிய பிரேமலதா, உலக வரலாற்றில் எந்த தலைவருக்கும் இல்லாத அளவுக்கு கேப்டன் விஜயகாந்துக்கு மக்களின் ஆதரவு கிடைத்துள்ளதாக கூறினார்.
மக்களுக்கு பிரயோசனம் இருக்கா – பிரேமலதா கேள்வி
மக்கள் நாள்தோறும் குற்ற உணர்வோடு மன்றாடுகிறார்கள். கேப்டனுக்கு வந்தது அனுதாப அலை என்று நினைக்க வேண்டாம். நல்ல தலைவரை இழந்துவிட்டோம் என மக்கள் மன்னிப்பு கேட்கிறர்கள். ஆகையால் தனித்து போட்டியிடலாம் என்று கூறுகிறார்கள். ஆனால் நடைபெற உள்ளது நாடாளுமன்ற தேர்தல் என்பதால் அதிக தொகுதிகளை ஒதுக்கும் கட்சியுடன் கூட்டணி வைக்க முடிவு செய்யப்பட்டுள்ளதாக கூறினார்.
2014 ஆம் ஆண்டு தேர்தலில் தேசிய ஜனநாயக கூட்டணி தேமுதிகவுக்கு 14 மக்களவை தொகுதி மற்றும் ஒரு ராஜ்யசபா சீட் ஒதுக்கியதை போல் இப்போது அதே அளவு தொகுதிகளை ஒதுக்கும் கட்சியுடன்தான் கூட்டணி. யாருடன் கூட்டணி என்பது இன்னும் முடிவு செய்யவில்லை. பிப்ரவரி 12 ஆம் தேதிக்குள் தேமுதிக கூட்டணி நிலைப்பாடு குறித்து அறிவிக்கப்படும். மேலும் 4 மண்டலங்களிலும் பிரம்மாண்டாக பொதுக்கூட்டம் நடத்தப்படும் என்றும் தேமுதிக பொதுச்செயலாளர் பிரேமலதா விஜயகாந்த் தெரிவித்தார்.
மறைந்து தேமுதிக தலைவர் விஜயகாந்தின் லக்கி நம்பர் 5 என்பதால் மக்களவை தேர்தலிலும் கூட்டுத்தொகை 5 வருவது போல் 14 தொகுதிகளை கேட்டுள்ளார் பிரேமலதா. கடந்த 2014 ஆம் ஆண்டு நாடாளுமன்ற தேர்தலில் 14 தொகுதிகளில் போட்டியிட்ட தேமுதிக ஒரு தொகுதியில் கூட வெற்றி பெறவில்லை. இம்முறை விஜயகாந்த் இல்லாமல் தேர்தலை சந்திக்க உள்ளது தேமுதிக.
No comments