குவியும் ஆடைகளும் தயங்கும் மக்களும்: நெல்லை அன்புச் சுவரின் நிலை
“நமக்குத் தேவையில்லாதது, இன்னொருவருக்குத் தேவையாக இருக்கலாம்” என்ற நோக்கில், 2017-ஆம் ஆண்டு அன்றைய நெல்லை மாவட்ட ஆட்சியர் சந்தீப் நந்தூரியால் தொடங்கப்பட்டதுதான் இந்த ‘அன்புச் சுவர்’.
ஆரம்பத்தில் புத்தகங்கள், ஆடைகள் உள்ளிட்ட பயனுள்ள பொருட்கள் இங்கு வைக்கப்பட்டன. இன்று பெரும்பாலும் ஆடைகள் மட்டுமே வைக்கப்படுகின்றன. இன்றும் பலர் அவற்றை எடுத்துப் பயன்படுத்தி வருகின்றனர்.
தற்போது திருநெல்வேலி ஜங்ஷன் பெரியார் பேருந்து நிலையம் மற்றும் திருநெல்வேலி அரசு மருத்துவக் கல்லூரி அருகே என இரண்டு இடங்களில் இந்த அன்புச் சுவர் இயங்கி வருகிறது.
மாவட்ட ஆட்சியரால் தொடங்கப்பட்டு மக்கள் மத்தியில் வரவேற்பைப் பெற்ற இத்திட்டத்தில், பொதுமக்கள் தங்களுக்குத் தேவையில்லாத ஆடைகள் மற்றும் பொருட்களைத் தொடர்ந்து வைத்துச் செல்கின்றனர். ஆனால், அவற்றை ஒழுங்குபடுத்தவும், இடத்தை முறையாகப் பராமரிக்கவும் ஆட்கள் இல்லாததால், பொருட்கள் குவிந்து கிடக்கும் நடைமுறைச் சிக்கல் ஏற்படுகிறது.
சாலையோரம் ஆடைகள் குவிந்து தூசி படிந்து இருப்பதால், அங்கிருந்து தேவையான ஆடைகளை எடுத்துப் பயன்படுத்த மக்கள் தயங்கும் நிலை ஏற்படுகிறது.
பொதுமக்களின் பொறுப்புணர்வும், மாவட்ட நிர்வாகத்தின் சரியான பராமரிப்பும் இணையும்போதுதான் ‘அன்புச் சுவர்’ நோக்கம் முழுமையடையும்.
