திடீர் உடல் நலக்குறைவு; எய்ம்ஸில் அனுமதிக்கப்பட்டுள்ள முன்னாள் குடியரசுத் துணைத் தலைவர் ஜகதீப் தன்கர் | India News (இந்தியா செய்திகள்)

முன்னாள் குடியரசுத் துணைத் தலைவர் ஜகதீப் தன்கர் (75), இன்று காலை வழக்கம்போல் தனது நடைபயிற்சியை மேற்கொண்டிருந்துள்ளார். அப்போது திடீரென அவர் மயக்கமடைந்துள்ளார். இதனைத் தொடர்ந்து அவரது பாதுகாவலர்கள் அவரை உடனடியாக மீட்டு அவரது வீட்டிற்கு அழைத்துச் சென்றுள்ளனர். அங்கு எய்ம்ஸ் மருத்துவர் சந்தீப் சேத்து அவருக்கு முதலுதவி அளித்து, அங்கிருந்து ஆம்புலன்ஸ் மூலம் டெல்லி எய்ம்ஸ் மருத்துவமனைக்கு அழைத்துச் செல்லப்பட்டு அனுமதிக்கப்பட்டுள்ளார்.

2022 முதல் 2025ஆம் ஆண்டு வரை துணைக் குடியரசுத் தலைவராக பதவி வகித்துவந்த ஜகதீப் தன்கர் தனது உடல்நிலை காரணத்திற்காக அந்தப் பதவியை ராஜினாமா செய்திருந்தார். இதனைத் தொடர்ந்து ஜூன் 2025 மற்றும் ஜனவரி 2026 ஆகிய காலங்களில் அவரின் உடல்நிலையில் பிரச்சனை ஏற்பட்டு மருத்துவமனையில் அனுமதிக்கப்பட்டு சிகிச்சை பெற்று திரும்பியிருந்தார் என்பது நினைவுகூரத்தக்கது.