Last Updated:
ஜெர்மனியில் இருந்து டெல்லி சென்ற ஏர் இந்தியா விமானம், வெடிகுண்டு மிரட்டல் காரணமாக ஜெய்ப்பூரில் அவசரமாகத் தரையிறக்கப்பட்டது.
ஜெர்மனியின் பிராங்க்பர்ட் (FRANKFURT) நகரிலிருந்து டெல்லி நோக்கி வந்த ஏர் இந்தியா விமானம், கடத்தல் மற்றும் வெடிகுண்டு மிரட்டல் காரணமாக ராஜஸ்தான் மாநிலம் ஜெய்பூரில் அவசரமாகத் தரையிறக்கப்பட்டது.
13 விமான பணியாளர்கள், 293 பயணிகளுடன் ஜெர்மனியில் இருந்து டெல்லி நோக்கி வந்துக் கொண்டிருந்த ஏர் இந்தியா விமானத்திற்கு கடத்தல் எச்சரிக்கை வந்ததாக தெரிகிறது. இதனையடுத்து, ஸ்வாக் 7500 என்ற விமான கடத்தல் தொடர்பான சமிக்ஞையை வான்வழிப் போக்குவரத்து கட்டுப்பாட்டு மையத்திற்கு விமானி கொடுத்ததுள்ளார்.
பின்னர், டெல்லி செல்ல வேண்டிய விமானம், புதன்கிழமை காலை 9:35 மணிக்கு ஜெய்ப்பூர் சர்வதேச விமான நிலையத்தில் அவசர அவசரமாக தரையிறக்கப்பட்டது. விமானத்தில் இருந்த பயணிகளும் பாதுகாப்பாகக் கீழே இறக்கப்பட்டு, அவர்களது உடமைகள் தீவிர சோதனைக்கு உட்படுத்தப்பட்டது.
இதனையடுத்து சம்பந்தப்பட்ட விமானம் தனிமைப்படுத்தப்பட்டு சோதனைக்கு உட்படுத்தப்பட்டது. மத்திய தொழில் பாதுகாப்புப் படையினர், பயங்கரவாத தடுப்புப் பிரிவு உள்ளிட்டோர் தீவிர சோதனையில் ஈடுபட்டனர். வெடிகுண்டு மிரட்டல் புரளி என்பது தெரியவந்தது. விமானி தவறுதலாக இந்த எச்சரிக்கை சமிக்ஞை விடுத்தாரா? அல்லது இதற்குப் பின்னணியில் வேறு ஏதேனும் காரணங்கள் உள்ளனவா? என்பது குறித்து சிவில் விமானப் போக்குவரத்து இயக்குநரகம் விசாரித்து வருவதாகத் தகவல்கள் வெளியாகியுள்ளன.
