இந்த விழாவில் உரையாற்றிய பிரதமர், ஹிஞ்சேவாடி மற்றும் சிவாஜிநகர் இடையே மெட்ரோ ரயில் சேவை தொடங்குவதன் மூலம் புனேவின் தகவல் தொழில்நுட்ப (IT) மையத்திற்கு சிறந்த போக்குவரத்து இணைப்பு கிடைக்கும் என்று கூறினார். இந்த புதிய மெட்ரோ பாதை நகரின் பழைய மற்றும் புதிய பகுதிகளை எளிதில் இணைக்கப் பெரிதும் உதவும் என்றும் அவர் தெரிவித்தார்.
நாட்டில் வறுமை ஒழிப்பு நடவடிக்கை மற்றும் பொருளாதார வளர்ச்சி குறித்துப் பேசிய பிரதமர் மோடி, இந்தியா தற்போது மிகவும் வேகமான பொருளாதார வளர்ச்சியை அடைந்து வரும் நாடாகவும், அதே வேளையில் வேகமாக வறுமையைக் குறைத்து வரும் நாடாகவும் திகழ்கிறது என்று பெருமிதத்துடன் குறிப்பிட்டிருந்தார்.
பல தலைமுறைகளாக வறுமை ஒழிப்புக்கான முழக்கங்கள் மற்றும் வாக்குறுதிகளை மட்டுமே நாடு கேட்டு வந்ததாகவும், முன்னதாக வறுமைக்கு எதிரான போராட்டம் வெறும் முழக்கங்களோடு மட்டுமே நின்ற நிலையில், தற்போது தற்போதைய அரசு களத்தில் இறங்கி வறுமையை ஒழிக்கும் பணிகளை நேரடியாகச் செய்து வருவதாகவும் அவர் சுட்டிக்காட்டினார்.
இந்தியாவில் மெட்ரோ ரயில் நெட்வொர்க் விரிவாக்கம் குறித்து புள்ளிவிவரங்களைப் பகிர்ந்த பிரதமர் மோடி, நாட்டில் முதன்முதலில் 1984-இல் மெட்ரோ தொடங்கப்பட்டதாக நினைவு கூர்ந்தார். அதன்பிறகு 30 ஆண்டுகளில் (2014 வரை) நாடு முழுவதும் வெறும் 248 கிலோமீட்டர் தூரத்திற்கு மட்டுமே மெட்ரோ பாதைகள் அமைக்கப்பட்டிருந்தன என்றும், 5 நகரங்களில் மட்டுமே மெட்ரோ ரயில்கள் இயங்கி வந்தன என்றும் கூறினார்.
ஆனால், 2014-இல் NDA அரசு அமைந்த பிறகு, நகரங்களில் வாழும் நடுத்தர மக்களின் வாழ்க்கைத்தரத்தை உயர்த்தவும், தடையற்ற போக்குவரத்து வசதியை ஏற்படுத்தவும் எடுக்கப்பட்ட முயற்சிகளால், இன்று நாட்டின் மெட்ரோ நெட்வொர்க் 1,400 கிலோமீட்டராக உயர்ந்துள்ளதுடன், 26 நகரங்களில் மெட்ரோ சேவைகள் கிடைக்கப் பெற்று வருகின்றன. தற்போது நாள்தோறும் 1 கோடிக்கும் அதிகமான மக்கள் மெட்ரோவில் பயணம் செய்கின்றனர் என்று பிரதமர் கூறினார்.
புனே நகரம் தகவல் தொழில்நுட்பம், ஆட்டோமொபைல், மருந்தியல், ஸ்டார்ட்-அப் மற்றும் உற்பத்தித் துறைகளின் முக்கிய மையமாகத் திகழ்கிறது என்று குறிப்பிட்ட பிரதமர், சுமார் 10 ஆண்டுகளுக்கு முன்பு புனே மெட்ரோவின் முதல் கட்டப் பணிகளுக்குத் தாம் அடிக்கல் நாட்டியதை நினைவு கூர்ந்தார்.
ஒரு நகரத்தின் போட்டித்தன்மை மற்றும் அங்கு மக்கள் வாழ்வதற்கு உள்ள எளிமை ஆகியவற்றைக் கொண்டே அந்த நகரத்தின் அடையாளம் தீர்மானிக்கப்படுகிறது என்றும், மெட்ரோ போன்ற உள்கட்டமைப்புத் திட்டங்கள் புனேவை வாழச் சிறந்ததாகவும், அணுக எளிதானதாகவும் மாற்றும் என்றும் கூறி பிரதமர் மோடி உரையை நிறைவு செய்தார்.
