Last Updated:
சேவை மனப்பான்மையுடன் கூடிய நிர்வாகமே வறுமை ஒழிப்பு, வீட்டுவசதித் திட்டங்கள் மற்றும் நாட்டின் கடைக்கோடி மக்களுக்கான நன்மைகளை சாத்தியமாக்குகிறது
அரச பதவிகளை விடவும் சேவைதான் முதன்மையானது என்று பிரதமர் நரேந்திர மோடி தெரிவித்துள்ளார்.
குஜராத்தில் உள்ள தமது பிறந்த ஊரான வட்நகரிலிருந்து, நாடாளுமன்றத் தொகுதியான வாரணாசி வரை இருசக்கர வாகனத்தில் பயணிக்கும் ‘சேவா யாத்ரீகர்’களுடன் பிரதமர் நரேந்திர மோடி உரையாடினார். அப்போது உரையாற்றிய அவர், மனித வாழ்க்கையின் முதன்மை நோக்கமே ‘சேவை’ தான் என்று சுட்டிக்காட்டினார். “சேவையே உயர்ந்த தர்மம்” என்ற கோட்பாடே அனைவரின் வழிகாட்டும் கொள்கையாக இருக்க வேண்டும் என்றார். அரசியல் துறையிலும், ஒருவர் எவ்வளவு பெரிய உச்சப் பதவியை எட்டினாலும், சேவை செய்வதே முதன்மையான கொள்கையாக நிலைத்திருக்க வேண்டும் என்று அவர் வலியுறுத்தினார்.
நாட்டின் நிர்வாகக் கொள்கைகளில் சேவை மனப்பான்மை இணையும் போது, அதுவே நாட்டின் வளர்ச்சிக்கு மிகப்பெரிய உந்துசக்தியாக மாறுகிறது. பிஎம்-கிசான் (PM-KISAN), பிஎம் சூர்ய கர் யோஜனா (PM Surya Ghar Yojana) போன்ற எண்ணற்ற திட்டங்கள் நாட்டின் கடைக்கோடி மனிதருக்கும் சென்று சேருவதற்கு இந்த எண்ணமே காரணம் என்று குறிப்பிட்டார். இந்தச் சேவையின் பலனால்தான் 4 கோடி ஏழை மக்களுக்கு நிரந்தர வீடுகள் கிடைத்துள்ளன என்றும், 25 கோடி இந்தியர்கள் வறுமையின் பிடியிலிருந்து விடுவிக்கப்பட்டுள்ளனர் என்றும் பெருமிதத்துடன் தெரிவித்தார்.
அரசியல், தேர்தல்கள் மற்றும் ஆட்சி அமைப்புகளுக்கு என்று தனித்தனி இடங்கள் உண்டு; ஆனால், நாம் அனைவரும் ‘தேசத்தைக் கட்டியெழுப்பும்’ (Nation-building) லட்சியப் பணியில் அர்ப்பணிக்கப்பட்டவர்கள் என்று பிரதமர் கூறினார்.
2047-ஆம் ஆண்டிற்குள் ‘வளர்ச்சியடைந்த இந்தியா’வை (Viksit Bharat) உருவாக்க இளைஞர் சக்தியின் பங்கு மிக முக்கியமானது. இன்றைய இளம் தலைமுறையினரே இந்த வளர்ச்சியடைந்த இந்தியாவின் முதன்மைச் சிற்பிகளாகவும், அதன் பலன்களை அனுபவிக்கும் முக்கியப் பயனாளிகளாகவும் இருப்பார்கள் என்று பிரதமர் மோடி நம்பிக்கை தெரிவித்தார்.
மேலும் சேவை மனப்பான்மையுடன் கூடிய நிர்வாகமே வறுமை ஒழிப்பு, வீட்டுவசதித் திட்டங்கள் மற்றும் நாட்டின் கடைக்கோடி மக்களுக்கான நன்மைகளை சாத்தியமாக்குகிறது என்பதை பிரதமர் தனது உரையில் தெளிவுபடுத்தியுள்ளார்.
