Last Updated:
அமலாக்கத் துறை சூப்பர் போலீஸ் அல்ல என கர்நாடக உயர்நீதிமன்றம் தெரிவித்துள்ளது. காங்கிரஸ் எம்எல்ஏ நஞ்சே கவுடா மீதான பணமோசடி வழக்கை நீதிமன்றம் ரத்து செய்தது.
அமலாக்கத் துறை ஒன்றும் சூப்பர் போலீஸ் அல்ல என கர்நாடக உயர்நீதிமன்றம் தெரிவித்துள்ளது.
கர்நாடக காங்கிரஸ் எம்எல்ஏ நஞ்சே கவுடா மாலூர் நில மானியக் குழுவின் தலைவராக இருந்தபோது சட்டவிரோதமான முறையில் 80 ஏக்கர் நிலத்தை வழங்கியதாகவும், நஞ்சே கவுடா தலைவராக உள்ள கோலார் மற்றும் சிக்கபல்லூர் மாவட்ட கூட்டுறவு பால் உற்பத்தியாளர்கள் யூனியன் ஊழியர்கள் நியமனத்திலும் முறைகேடு நடந்ததாக குற்றஞ்சாட்டி அமலாக்கத்துறை விசாரணையைத் தொடங்கியது.
இதனை எதிர்த்து தொடரப்பட்ட வழக்கை விசாரித்த கர்நாடக உயர்நீதிமன்ற நீதிபதி எம்.ஐ.அருண், மாநில விசாரணை அமைப்புகளால் வழக்குப்பதிவு செய்யப்படாத நிலையில், எதன் அடிப்படையில் அமலாக்கத்துறை விசாரணையைத் துவக்கியது என கேள்வி எழுப்பினார்.
மேலும், அமலாக்கத்துறை ஒன்றும் சூப்பர் போலீஸ் அல்ல எனவும், பிற விசாரணை அமைப்புகள் மேற்கொள்ளும் நடவடிக்கைகளின் அடிப்படையிலேயே வழக்குப்பதிவு செய்து புலனாய்வை தொடங்கும் அதிகாரம் உள்ளதாகவும் தெரிவித்தார்.
அடிப்படை குற்றம் கண்டறியப்படாத நிலையில், பண மோசடி வழக்கில் அமலாக்கத்துறையால் நடவடிக்கைகளை தொடர முடியாது எனவும் நீதிபதி உத்தரவிட்டார்.
