அமெரிக்க அதிபர் டொனால்டு டிரம்ப் மற்றும் உக்ரைன் அதிபர் ஜெலன்ஸ்கி ஆகியோர் இன்று வெள்ளை மாளிகையில் சந்தித்தனர். அப்போது ரஷ்யா – உக்ரைன் இடையேயான போரை முடிவுக்கு கொண்டு வருவது தொடர்பாகவும் உக்ரைனுக்கு எதிர்க்கால ஆதரவளிப்பது தொடர்பாகவும் ஒப்பந்தம் மேற்கொள்ள திட்டமிடப்பட்டிருந்தது.
ஆனால் அமெரிக்காவின் ஒப்பந்தத்தில் கையெழுத்திட ஜெலன்ஸ்கி மறுத்துவிட்டார். இதனால் அதிபர் டிரம்ப் மற்றும்க ஜெலன்ஸ்கி இடையே கடுமையான வாக்குவாதம் ஏற்பட்டது. டொனால்டு டிரம்ப், ஜெலன்ஸ்கியை கடுமையாக விமர்சித்தார். அமெரிக்கா ஆயுதங்கள் வழங்காமல் இருந்திருந்தால் இந்த போர் அப்போதே முடிவுக்கு வந்திருக்கும் என்றும் டிரம்ப் தெரிவித்தார்.
மேலும் ஜெலன்ஸ்கியால் மூன்றாம் உலகப் போர் மூளும் ஆபத்து ஏற்பட்டுள்ளதாகவும் அவர் கூறினார். அமெரிக்கா உங்களுக்கு செய்துள்ள உதவிக்கு நீங்கள் நன்றியுடன் நடந்து கொள்ளவில்லை என்றும் நேருக்கு நேராக சாடினார். இந்த வீடியோ காட்சிகள் சமூக வலைதளங்களில் பெரும் வைரலாகி வருகிறது. இது உலக நாடுகள் மத்தியில் பெரும் அதிர்ச்சியை ஏற்படுத்தியுள்ளது.
இந்நிலையில் வெள்ளை மாளிகையில் ஏற்பட்ட இந்த அதிர்ச்சியூட்டும் மோதலுக்குப் பிறகு, ரஷ்யாவின் கிரெம்ளினில் இருந்து அமெரிக்க அதிபருக்கு ஆதரவு வந்துள்ளது. ஜெலன்ஸ்கிக்கும் டிரம்புக்கும் இடையே வெள்ளை மாளிகையில் நடைபெற்ற இந்த வார்த்தை மோதலால் ரஷ்யா மகிழ்ச்சி அடைந்துள்ளது. ரஷ்ய வெளியுறவு அமைச்சக செய்தித் தொடர்பாளர் மரியா ஜகரோவா, பேச்சுவார்த்தையின் போது ஜெலென்ஸ்கியை உடல் ரீதியாகத் தாக்காமல் டிரம்ப் கட்டுப்பாட்டுடன் இருந்ததாக காட்டமாக தெரிவித்துள்ளார்.
இதுதொடர்பாக அவர் தனது சமூக வலைதள பக்கத்தில் பதிவிட்டிருப்பதாவது, “2022 ஆம் ஆண்டில் கிய்வ் ஆட்சி தனியாக இருந்தது, ஆதரவு இல்லாமல் இருந்தது என்று வெள்ளை மாளிகையில் அவர் கூறியதுதான் ஜெலென்ஸ்கியின் அனைத்து பொய்களிலும் மிகப்பெரிய பொய் என்று நான் நினைக்கிறேன்” என குறிப்பிட்டுள்ளார்.
மேலும், “அந்த கெட்ட நபரை அடிக்காமல் டிரம்பும் வான்ஸும் எப்படித் தடுத்தார்கள் என்பது கட்டுப்பாட்டின் அதிசயம்” என்றும், ஜெலென்ஸ்கி “அவருக்கு உணவளிக்கும் கையைக் கடித்துக் கொண்டிருந்தார்” என்றும் ரஷ்ய வெளியுறவு அமைச்சக செய்தித் தொடர்பாளர் மரியா ஜகரோவா தனது சமூக வலைதள பக்கத்தில் பதிவிட்டுள்ளார்.
மேலும் ஜெலன்ஸ்கியை யாருக்கும் பிடிக்கவில்லை என்றும் அவர் தெரிவித்துள்ளார். வெள்ளை மாளிகையில் ஜெலன்ஸ்கி கடுமையான அவமதிப்பை சந்தித்ததை ரஷ்ய பிரதிநிதிகள் கொண்டாடி வருகின்றனர். தொடர்ந்து ஜெலன்ஸ்கிக்கு எதிராக தங்களின் கருத்துக்களை கடுயைமாக தெரிவித்து வருகின்றனர்.
கமெண்ட் செய்ய விரும்பவில்லை