சூரத்: குஜராத்தின் சூரத் நகரில், தனது உறவினரின் வைர நிறுவனத்தில் கணினி ஆபரேட்டராக பணியாற்றும் வேலைக்கு தன்னை தகுதியற்றவராக மாற்றுவதற்காக, கூர்மையான கத்தியால் ஒருவர் தனது இடது கையின் நான்கு விரல்களை வெட்டிக் கொண்ட வினோதமான சம்பவமொன்று சனிக்கிழமை இடம்பெற்றுள்ளது. அந்த நிறுவனத்தில் வேலை செய்ய எனக்கு விருப்பம் இல்லை, ஆனாலும் என்னை அங்கு வேலை செய்ய வற்புறுத்தினர் என்பதற்காக தன விரல்களை தானே வெட்டிக்கொண்டார் என்று தெரிய வந்துள்ளது.
மயூர் தாராபரா (32) சாலையோரத்தில் மயக்கமடைந்து விழுந்த நிலையில் அவரது விரல்கள் வெட்டப்பட்டதை காவல்துறையினர் அறிந்தனர். இருப்பினும் இந்த சம்பவங்களின் சங்கிலித்தொடரில் நடத்தப்பட்ட விசாரணையில், இந்த வெட்டு அவரேஏற்படுத்திக் கொண்டது என்பது தெரியவந்தது என்று அதிகாரிகள் தெரிவித்தனர்.
சூரத் குற்றப்பிரிவு ஒரு அறிக்கையில், வரச்சா மினி பஜாரில் அமைந்துள்ள தனது நிறுவனமான அனாப் ஜெம்ஸ்-ல் இனி வேலை செய்ய விரும்பவில்லை என்று தனது உறவினர்களிடம் சொல்லத் துணிச்சல் இல்லாததால் தாராபரா இந்த நடவடிக்கையை எடுத்ததாகக் கூறினார்.
பாதிக்கப்பட்டவர் இந்த நிறுவனத்தில் கணக்குத் துறையில் கணினி ஆபரேட்டராக பணிபுரிகிறார், மேலும் விரல்களை வெட்டிக்கொண்டால் அவர் அந்த வேலைக்குத் தகுதியற்றவராக ஆவார் என்று கருதி தனது கையை தானே வெட்டிக்கொண்டார் என்று அறிக்கையில் கூறியுள்ளனர்.
முன்னதாக, டிசம்பர் 8 ஆம் தேதி மோட்டார் சைக்கிளில் ஒரு நண்பரின் வீட்டிற்குச் சென்று கொண்டிருந்தபோது, அம்ரோலியில் உள்ள வேதாந்தா சர்க்கிள் அருகே உள்ள ரிங் ரோட்டில் மயக்கம் ஏற்பட்டு மயங்கி விழுந்ததாக தாராபாரா போலீசாரிடம் தெரிவித்திருந்தார்.
10 நிமிடங்களுக்குப் பிறகு அவர் சுயநினைவு திரும்பியபோது, அவரது இடது கையில் நான்கு விரல்கள் வெட்டப்பட்டிருந்ததாக தாராபாரா போலீசாரிடம் தெரிவித்தார்.
அப்போது காவல்துறையினரின் கூற்றுப்படி, விரல்கள் வெட்டப்பட்டு சூனிய நோக்கங்களுக்காக எடுத்துச் செல்லப்பட்டிருக்கலாம் என்று சந்தேகிக்கப்பட்டது.
“சிங்கன்பூரில் உள்ள சார் ரஸ்தா அருகே உள்ள ஒரு கடையில் இருந்து கூர்மையான கத்தியை வாங்கியதாக தாராபரா ஒப்புக்கொண்டார். நான்கு நாட்களுக்குப் பிறகு, ஞாயிற்றுக்கிழமை இரவு, அவர் அம்ரோலி ரிங் ரோடுக்குச் சென்று தனது மோட்டார் சைக்கிளை அங்கே நிறுத்தினார். இரவு 10 மணியளவில், கத்தியால் நான்கு விரல்களை வெட்டி, இரத்த ஓட்டத்தைத் தடுக்க முழங்கையின் அருகே ஒரு கயிற்றைக் கட்டினார். பின்னர் அவர் கத்தியையும் விரல்களையும் ஒரு பையில் வைத்து எறிந்தார்,” என்று அந்த அதிகாரி கூறினார்.
அவரது நண்பர்கள் அவரை மருத்துவமனைக்கு அழைத்துச் சென்றனர், ஒரு பையில் இருந்து மூன்று விரல்கள் மீட்கப்பட்டதாகவும், மற்றொரு பையில் கத்தி கண்டெடுக்கப்பட்டதாகவும் அந்த அதிகாரி கூறினார்.
அம்ரோலி போலீசார் மேலும் விசாரணை நடத்தி வருவதாக அந்த அதிகாரி தெரிவித்தார்.
