45 நாட்கள் பிரமாண்டமாக நடைபெற்ற மகா கும்பமேளா நிறைவு… மொத்தம் எத்தனை கோடி பேர் பங்கேற்பு தெரியுமா?

குடியரசு தலைவர் திரவுபதி முர்மு, குடியரசு துணைத் தலைவர் ஜெகதீப் தன்கர், பிரதமர் நரேந்திர மோடி, மத்திய உள்துறை அமைச்சர் அமித் ஷா, மத்திய அமைச்சர்கள், மாநில ஆளுநர்கள், தொழிலதிபர்கள், நடிகர் நடிகைகைள், பல்துறை வல்லுநர்கள், வெளிநாடுகளைச் சேர்ந்தவர்கள் என ஏராளமானோர் திரிவேணி சங்கமத்தில் புனித நீராடினார்.

திரிவேணி சங்கமத்தில் நீராட, உலகம் முழுவதும் இருந்து கோடிக்கணக்கான பக்தர்கள் படையெடுத்த நிலையில், பிரயாக்ராஜ் நகருக்கான விமானக் கட்டணம் பல மடங்கு உயர்ந்தது. பிரயாக்ராஜ் நகருக்கு செல்லும் ரயில்களில் கட்டுக்கடங்காத கூட்டம் அலைமோதியது. ரயில்களில் ஏசி பெட்டிகளில் கண்ணாடி உடைப்பு போன்ற சம்பவங்களும் நிகழ்ந்தன.

மகா கும்பமேளாவில் புனித நீராட நேரில் வர முடியாதவர்கள் தங்களது புகைப்படத்தை அனுப்பி வைத்து அதனை நீரில் நனைத்தும், உறவினருக்கு வீடியோ காலில் அழைத்து செல்போனை திரிவேணி சங்கமத்தில் தண்ணீரில் மூழ்கி எடுத்த நிகழ்வுகளும் அரங்கேறின.

ஆறு வாரங்களாக விமர்சையாக நடைபெற்று வந்த கும்பமேளா மகாசிவராத்திரியான நேற்றுடன் நிறைவடைந்தது. நிறைவு நாளில் திரிவேணி சங்கமத்தில்புனித நீராடுவதற்காக ஏராளமான பக்தர்கள் குவிந்தனர். இதனால், பிரயாக்ராஜ் நகரை இணைக்கும் முக்கிய சாலைகளில் நீண்ட தொலைவுக்கு வாகனங்கள் அணிவகுத்து நின்றன.

கும்பமேளாவின் கடைசி நாள் என்பதால் பக்தர்கள் மீது ஹெலிகாப்டரில் இருந்து மலர்கள் தூவிப்பட்டன. இந்திய விமானப்படை சார்பில் விமான சாகச நிகழ்ச்சிகளும் நடத்தப்பட்டன.

45 நாட்களில் புனித நீராட பிரயாக்ராஜில் கோடிக்கணக்கானோர் கூடிய நிலையில், சில சோகமாக சம்பவங்களும் நடந்தன. தை அமாவாசை நாளான கடந்த மாதம் 29 ஆம் தேதி கூட்ட நெரிசல் ஏற்பட்டு 30 பேர் உயிரிழந்தனர். கடந்த 15 ஆம் தேதி நியூ டெல்லி ரயில் நிலையத்தில் இருந்து பிரயாக்ராஜ் செல்ல இருந்த ரயிலில் ஏற்பட்ட கூட்ட நெரிசலில் சிக்கி 18 பேர் உயிரிழந்தனர்.

இந்த கும்பமேளாவில் 66 கோடியே 21 லட்சத்திற்கும் மேற்பட்டோர் புனித நீராடியிருப்பதாக உத்தரப்பிரதேச முதலமைச்சர் யோகி ஆதித்யநாத் தெரிவித்துள்ளார். இது வரலாற்றில் எப்போதும் இல்லாதது என்றும் மறக்க முடியாத நிகழ்வு என்றும் யோகி ஆதித்யநாத் கூறியுள்ளார்.