டிஜிட்டல் நீராடல்… போட்டோக்களை கங்கை நதியில் நீராட வைத்து மகா கும்பமேளாவில் கல்லா கட்டிய நபர்

உத்தரப்பிரதேச மாநிலம் பிரயாக்ராஜ் திரிவேணி சங்கமத்தில் மகா கும்பமேளா விழா விமரிசையாக நடைபெற்று வருகிறது. பிப்ரவரி 26ஆம் தேதி மகா சிவராத்திரியுடன் கும்பமேளா நிறைவு பெறும் நிலையில், கோடிக்கணக்கான மக்கள் புனித நீராட மும்முரம் காட்டி வருகின்றனர். அதேநேரம், கும்பமேளா வரும் பக்தர்களின் செல்போன் சார்ஜ் செய்ய ஆயிரம் ரூபாய் உள்ளிட்ட புதிய யோசனைகள் மூலம் உள்ளூர் மக்கள் நல்ல வருவாய் ஈட்டி வருகின்றனர்.

அந்த வரிசையில் பிரயாக்ராஜை சேர்ந்த நபர் ஒருவர் டிஜிட்டல் நீராடல் என்ற பெயரில் வருவாய் ஈட்டி வருகிறார். திரிவேணி சங்கமத்திற்கு நேரடியாக வர முடியாதவர்கள் தங்களது புகைப்படங்களை அனுப்பினால், அதை கங்கை நதியில் நீராடச் செய்கிறார். இதற்கு ஆயிரத்து நூறு ரூபாய் கட்டணமாக அந்த நபர் வசூலித்து வருகிறார். டிஜிட்டல் நீராடலுக்கு ஆதரவு தெரிவித்தாலும், சமூக வலைதளங்களில் இது பேசு பொருளாகி உள்ளது.

பிரயாக்ராஜில் 144 ஆண்டுகளுக்கு ஒருமுறை நடக்கும் மகா கும்பமேளா ஜனவரி 13ஆம் தேதி தொடங்கி நடைபெற்று வருகிறது. இதனிடையே, திரிவேணி சங்கமத்தில் நடிகை தமன்னா தனது குடும்பத்தினருடன் புனித நீராடி வழிபட்டார். வரும் 26ஆம் தேதியுடன் கும்ப மேளா நிறைவடைய உள்ள நிலையில், இதுவரை 60 கோடி பேர் நீராடியுள்ளதாக உத்தரபிரதேச அரசு தெரிவித்துள்ளது.