வேங்கைவயல் மேல் நிலைக் குடிநீர்த் தொட்டியில் மலம் கலந்த குற்றவாளிகள் எனப் பாதிக்கப்பட்ட பட்டியல் சமூகத்தை 3 பேரைக் குற்றம்சாட்டுகிறது காவல்துறை. ஆனால், சி.பி.சி.ஐ.டி-யின் விசாரணை கறை படிந்தது எனவும் இந்த ஆதாரங்களை ஏற்க முடியாது எனவும் தெரிவிக்கிறார் மூத்த வழக்கறிஞர் ப.பா. மோகன். அவரைச் சந்தித்து நமது கேள்விகளை முன் வைத்தோம்.
வேங்கைவயல் விஷயத்தில் ஒரு நிலை அறிக்கை காவல் துறை தரப்பிலிருந்து தாக்கல் செய்யப்பட்டு உள்ளது. விசாரணையில் சாட்சிகள் அடிப்படையில் வேங்கைவயல் பட்டியலினச் சமூக மக்களான 3 பேர் மீது குற்றச்சாட்டு முன் வைக்கிறார்கள். இதைப் பற்றி உங்கள் கருத்து?
ஏற்கெனவே இது போன்று நிலை இருக்கிறது என்று தெரிந்து கொண்டு 15/06/2024 ஆம் தேதி அன்று சென்னை பிரஸ் கிளப்பில் பேசியிருந்தேன். தலித் மக்கள் வாழுகின்ற பகுதியில் அவர்கள் பயன்படுத்தும் தண்ணீர் தொட்டியில் மலம் கலந்த விஷயம் என்பது தமிழ்நாட்டை மட்டுமல்ல ஒட்டுமொத்த இந்தியாவையே உலுக்கிய ஒரு விஷயம். இந்த வழக்கை சி.பி.சி.ஐ.டி-க்கு மாற்றப்பட்ட பிறகு 397 பேரை விசாரித்து உள்ளனர். 196 செல்போன்களின் டவர் லைன்களை பார்த்துள்ளனர். வாய்ஸ் டெஸ்ட் மற்றும் டிஎன்ஏ போன்ற பரிசோதனைகள் செய்யப்பட்டுள்ளன என்று சொன்னார்கள்.
இந்த வழக்கு வன்கொடுமை தடுப்புச் சட்டத்தின் கீழ் போடப்பட்ட வழக்கு. கனகராஜ் என்பவர் அவரின் மகள் கோபிகாஸ்ரீ என்பவருக்குக் குடித்திருக்கும் தண்ணீராலோ அல்லது வேறு ஏதேனும் ஒரு காரணத்தினாலோ உடல் பாதிப்பு ஏற்பட்டு முதலில் ஆரம்பச் சுகாதார நிலையத்திற்குச் செல்கின்றனர். அங்கிருந்து அவர்கள் புதுக்கோட்டை அரசு மருத்துவமனைக்குச் செல்ல அறிவுறுத்தப்படுகிறார். அங்கு நடத்தப்பட்ட ஆய்வில்தான் கண்டாமினேட்டட் வாட்டர் இருந்ததாகச் சொல்கின்றனர்.
இதற்கிடையில் குடிநீரில் ஏதோ கலந்திருப்பது என்பதனை அறிந்து மக்கள் சொன்னதுடனேயே முத்துராஜ் என்ற ஆயுதப்படைக் காவலர் தண்ணீர் தொட்டிக்கு மேலே சென்று குடிநீரில் மலம் கலந்திருப்பதைப் பார்க்கிறார். அவருடன் சுதர்சன் என்பவர்தான் அதனைப் படம்பிடித்து ஊடகத்திற்குக் காட்டுகிறார். அதன் பிறகுதான் ஊடகத்திற்குத் தெரிய வந்து இந்தப் பிரச்னை பெரிய விஷயமாக மாறுகிறது.
தன் மகள் பாதிக்கப்பட்டு இருக்கிறாள் என்பதனை அறிந்து கனகராஜ் என்பவர் அருகிலுள்ள வள்ளனூர் காவல் நிலையத்தில் புகாரளிக்கிறார். அந்தப் புகாரின் அடிப்படையில் தான் இது வன்கொடுமை தடுப்புச் சட்டத்தின் கீழ் பதிவு செய்யப்பட்டு, அதில் 31BX, 279, 328 ஐபிசி பிரிவுகளின் கீழ் வழக்குப் பதிவு செய்து லோக்கல் போலீஸாரால் விசாரணை மேற்கொள்ளப்பட்டு வந்தது. மக்கள் அங்குக் கூடுவதினாலும் பிரச்னை செய்வதினாலும் இந்த வழக்கு சி.பி.சி.ஐ.டி-க்கு மாற்றப்பட்டது. அப்படி மாற்றப்பட்ட பிறகு நாங்கள் அந்த இடத்திற்குச் சென்று ஆய்வு செய்தோம். அவர்கள் அனைவரையும் நாங்கள் வரவழைத்துப் பேசினோம். இதுபோன்று கலந்து உள்ளது என்று தெரிந்த உடனே அதனைப் பாதுகாத்து போலீசார் விசாரணை மேற்கொண்டு இருக்க வேண்டும். ஆனால் போலீசார் அப்படி செய்யாமல் தாசில்தார், பி.டி.ஓ, அந்த ஊரின் பஞ்சாயத்துத் தலைவர் பத்மா முன்னிலையில் அந்த தண்ணீர்த் தொட்டியை இடித்து தரைமட்டம் ஆக்கியுள்ளனர்.
கண்ணால் பார்த்த சாட்சி ஏதும் இல்லாத நிலையில் குற்றம் நடந்த சூழ்நிலையில் இருக்கும் ஆதாரங்கள் அனைத்தையும் கைப்பற்ற வேண்டும். ஆதாரங்களைக் கைப்பற்றுவதற்கு முன்பே தண்ணீர் தொட்டியை இடித்துவிட்டதால் மக்கள் பெரும் கோபத்துக்கு உள்ளாகிப் போராடுகிறார்கள். அந்த தண்ணீர் தொட்டியின் குழாயிலிருந்த மலத்தை டி.என்.ஏ ஆய்வு செய்வதற்கும் இந்த மக்களையே அழைக்கின்றனர். தொலைப்பேசிக்கும் இந்த மக்களையே அழைக்கின்றனர்.
ஏஆதாரங்களில் முதன்மையான ஆதாரமாக எடுத்துக் கொள்வது மோட்டிவ். இரண்டாவது லாஸ்ட் இன் தியரி. மூன்றாவது இன்கிரிமெண்டல் எவிடன்ஸ் என்று பார்ப்பது தான் வழக்கம். முதலில் மோட்டிவ் என்ன என்று பார்க்க அங்கே சென்று பார்த்த போது முதலில் இரட்டை டம்ளர் பிரச்சனை அங்கே இருந்து வருகிறது. இதனை எதிர்த்து சில மக்கள் போராடுகின்றனர். இறையனூர் என்ற கோயிலில் தலித் மக்களை உள்ளே விடாமல் இருப்பது மற்றொன்று. இவற்றிற்கெல்லாம் அடுத்தபடியாகக் கிராம சபைக் கூட்டத்தில் பத்மாவின் கணவராக இருக்கும் முத்தையா இதுவரை கட்டாத தண்ணீர் தொட்டியைக் கட்டி விட்டோம் என்று தவறாகக் கூறியதால், மக்கள் பெரும் கோபத்திற்கு உள்ளாகினர். இந்த பஞ்சாயத்துத் தேர்தலில் பத்மா அவர்களுக்கு ஓட்டுப் போட வேண்டும் என்றால் இந்த மக்களுக்கு நீங்கள் ஒரு தண்ணீர் தொட்டியைக் கட்டித் தருமாறு டேங்க் ஆபரேட்டராக வேலை செய்யும் ஒருவர் கேட்டிருக்கிறார்.
ஏற்கனவே தண்ணீர் தொட்டி இருந்தாலும் அங்கிருந்து தண்ணீர் ஒவ்வொரு வீட்டிற்கும் செல்லும்படியாக எந்த வசதியும் செய்யப்படவில்லை. தண்ணீர் தொட்டி கட்டி தருகிறேன் என்று வாக்குறுதி கொடுத்தாலும் அதைச் செயல்படுத்தவில்லை. இதனால் மக்களிடையே பெரும் பிரச்னை இருந்து வந்துள்ளது. டேங்க் ஆபரேட்டர் தலித் சமூகத்தைச் சேர்ந்தவர் அல்ல என்பது குறிப்பிடத்தக்கது. நீங்கள் தண்ணீர் தொட்டி கட்டி தருகிறேன் என்பதால்தான் நான் ஓட்டு வாங்கிக் கொடுத்தேன் என்று டேங்க் ஆபரேட்டர் சங்கர் கூறுகிறார். எனவே டேங்க் ஆபரேட்டரை அந்தப் பணியிலிருந்து நீக்கி வேறொருவரை அந்த பணியில் வைக்கின்றனர். அவரைப் பணியிலிருந்து நீக்கியது தவறு என்று மக்கள் போராடுகின்றனர். தன்னை அம்பலப்படுத்தியதால் இன்றைக்கும் வேறொருவரைப் பணியில் சேர்த்தாலும் இவரைப் பணியில் சேர்ப்பதில்லை.
