புதுக்கோட்டை மாவட்டம், இறையூர் வேங்கைவயல் கிராமத்தில் கடந்த 2022-ம் ஆண்டு டிசம்பர் 26-ம் தேதி பட்டியல் சமூக மக்கள் பயன்படுத்தும் மேல்நிலை நீர்தேக்க தொட்டியில் மனித கழிவு கலக்கப்பட்டது. இந்த சம்பவம் நாடு முழுவதும் அதிர்ச்சியை ஏற்படுத்திய நிலையில், இதனைக் கண்டித்து பல்வேறு அரசியல் கட்சிகள் ஆர்ப்பாட்டம் நடத்தின. அதனால், இந்த சம்பவம் தொடர்பாக சி.பி.சி.ஐ.டி போலீஸார் விசாரணை நடத்தி வருகின்றனர். சம்பவம் குறித்து விசாரிக்க உயர் நீதிமன்ற ஓய்வுபெற்ற நீதிபதி எம்.சத்தியநாராயணன் தலைமையில் ஒரு நபர் ஆணையத்தை அமைத்து உயர் நீதிமன்றம் உத்தரவிட்டது.
இதுதொடர்பான நீதிமன்ற வழக்கு விசாரணையில் அரசுத்தரப்பில், வேங்கைவயல் வழக்கில் 389 சாட்சிகளும், 196 செல்போன்களும் பறிமுதல் செய்யப்பட்டு, அதில் உள்ள எண்கள் ஆய்வு செய்யப்பட்டுள்ளன. அதேபோல 87 டவர் லொகேஷன்கள் ஆய்வு செய்யப்பட்டு, அதில் உள்ள புள்ளி விவரங்கள் சேகரிக்கப்பட்டு, அதனடிப்படையில் 31 நபர்களிடம் டிஎன்ஏ பரிசோதனை மேற்கொள்ளப்பட்டது என அறிக்கை தாக்கல் செய்யப்பட்டுள்ளது.
