சிவகங்கை: அவதூறுகளாலும் பொய்களாலும் திமுக ஆட்சியை வீழ்த்த முடியாது என முதல்வர் மு.க. ஸ்டாலின் தெரிவித்தார்.
சிவகங்கையில் புதன்கிழமை நடைபெற்ற அரசு விழாவில், முடிவுற்ற திட்டப் பணிகளைத் திறந்துவைத்தும், புதிய திட்டப் பணிகளுக்கு அடிக்கல் நாட்டியும், ரூ.161 கோடியில் 53,039 பயனாளிகளுக்கு அரசு நலத் திட்ட உதவிகளை வழங்கியும் முதல்வர் மு.க. ஸ்டாலின் பேசியதாவது:
2021 சட்டப்பேரவைத் தேர்தலின்போது, திமுக சார்பில் கொடுத்த 505 வாக்குறுதிகளில் இதுவரை 389 வாக்குறுதிகளை நிறைவேற்றியிருக்கிறோம். இன்னும் 116 வாக்குறுதிகள்தான் நிறைவேற்றப்பட வேண்டும். அரசில் மொத்தம் 34 துறைகள் இருக்கின்றன. ஒவ்வொரு துறைக்கும் 2, 3 திட்டங்களை நிறைவேற்ற வேண்டிய அளவில்தான் வாக்குறுதிகள் மீதம் இருக்கின்றன. நாங்கள் இதை ஒப்புக்கொள்கிறோம். மறுக்கவில்லை.
கடந்த 2011, 2016 சட்டப்பேரவைத் தேர்தல்களின்போது, அதிமுக சார்பில் வெளியிடப்பட்ட தேர்தல் அறிக்கைகளை எடுத்து ஒவ்வொரு வாக்குறுதியையும் நிறைவேற்றிய நாள், இதனால் பயனடைந்தவர்கள் விவரம் என்ற பட்டியலை புத்தகமாக அதிமுகவினர் வெளியிடுவார்களா?.
முழுவதுமாக 10 ஆண்டுகள் ஆட்சி செய்து, தமிழ்நாட்டை அதலபாதாளத்தில் தள்ளியதை மக்கள் மறந்திருப்பார்கள் என்று நினைத்து, புது புதுக் கதைகளோடு வருகிறார் எதிர்க்கட்சித் தலைவர். தமிழ்நாட்டின் வளர்ச்சியைப் பாழாக்கியவர்கள், மாநிலம் திவாலாகிவிட்டது என்று புது புரளியைக் கிளப்புகிறார்கள். அவதூறுகளாலும் பொய்களாலும் திமுக ஆட்சியை வீழ்த்த முடியுமா என்று பார்க்கிறார்கள். அது, நிச்சயம் முடியாது.
2011 திமுக ஆட்சிக் காலத்தில் உபரி வருவாய் மாநிலமாக இருந்த தமிழ்நாட்டை, 2013-ஆம் ஆண்டுமுதல் பற்றாக்குறை மாநிலமாக மாற்றியது அதிமுக அரசு.
கடந்த 2017-19-ஆம் ஆண்டுகளில் இந்தியாவிலேயே அதிக அளவு வருவாய்ப் பற்றாக்குறை கொண்ட மாநிலமாக தமிழ்நாட்டை தத்தளிக்கவிட்டார்கள். இப்படிப்பட்ட இக்கட்டான நெருக்கடியிலிருந்து தமிழ்நாட்டை மீட்டிருக்கிறோம்.
சிவகங்கை மாவட்டத்தில் வளர்ச்சித் திட்டங்கள்: சிவகங்கை மாவட்டத்தில் பல்வேறு வளர்ச்சித் திட்டங்களைச் செயல்படுத்தி உள்ளோம். இந்த மாவட்டத்தில் 91,265 பேருக்கு ரூ.38.52 கோடியில் நலத் திட்ட உதவிகள் வழங்கப்பட்டுள்ளன. அடுத்தடுத்து இன்னும் அதிகமாகச் செய்து தர இருக்கிறோம். இதற்கு அடையாளமாக இந்த விழாவில் 3 திட்டங்களை அறிவிக்கிறேன்.
