நடப்பு சாம்பியன் டிங் லிரேன் (சீனா), இளம் வீரா் டி. குகேஷ் (இந்தியா) ஆகியோா் இடையிலான ஃபிடே உலக செஸ் சாம்பியன்ஷிப் போட்டி 2 சுற்றுகளே உள்ள நிலையில் பரபரப்பான கட்டத்தை எட்டியுள்ளது.
ஃபிடே, சா்வதேச செஸ் சம்மேளனம் சாா்பில் சிங்கப்பூரில் உலக செஸ் சாம்பியன்ஷிப் போட்டிகள் நடைபெற்று வருகின்றன.
மொத்தம் 14 சுற்றுகள் கொண்ட இப்போட்டியில் இதுவரை 12 சுற்றுகள் முடிவடைந்துள்ளன. இதில் நடப்பு சாம்பியன் டிங் லிரேன் (32), கேண்டிடேட்ஸ் செஸ் சாம்பியன் குகேஷ் இருவரும் தலா 6 புள்ளிகளுடன் சமநிலையில் உள்ளனா்.
லிரேனை வீழ்த்திய குகேஷ் 6-5 என புள்ளிகள் அடிப்படையில் முன்னிலை பெற்றிருந்தாா். ஆனால் 12-ஆவது சுற்றில் லிரேனுடன் தோல்வி கண்ட நிலையில், இருவரும் தலா 6 புள்ளிகளுடன் உள்ளனா்.
உலக செஸ் சாம்பியன்ஷிப் போட்டியில் செவ்வாய்க்கிழமை ஓய்வு நாளாகும். புதன்கிழமை 13-ஆவது சுற்று ஆட்டமும், வியாழக்கிழமை 14-ஆவது சுற்று ஆட்டமும் நடைபெறவுள்ளது.
7.5 புள்ளிகளை முதலில் பெறுபவா் சாம்பியன்:
ஃபிடே விதிகளின்படி இப்போட்டியில் முதலில் 7.5 புள்ளிகளை ஈட்டும் வீரரே உலக செஸ் சாம்பியன் பட்டத்தை கைப்பற்றுவாா். தற்போது 2 சுற்றுகளே உள்ள நிலையிலும், தலா 6 புள்ளிகளுடன் உள்ளதாலும், கடைசி சுற்று ஆட்டத்தில் தான் சாம்பியன் தீா்மானிக்கப்படுவாா்.
ஒரு சுற்றில் வென்றால் 1 புள்ளியும், டிரா கண்டால் 0.5 புள்ளியும் வீரருக்கு வழங்கப்படுகிறது.
இதுவரை குகேஷ், லிரேன் இருவரும் 2 ஆட்டங்களில் வென்றுள்ளனா். வெற்றியால் 2 புள்ளிகளையும், டிராக்களால் 4 புள்ளிகளையும் பெற்றுள்ளனா்.
13-ஆவது சுற்று: புதன்கிழமை 13-ஆவது சுற்று ஆட்டத்தில் குகேஷ் வெள்ளை நிறக் காய்களுடன் வெற்றிக்காக போராடுவாா். இதன் மூலம் 7 புள்ளிகளை அவா் பெறலாம். 14-ஆவது சுற்று ஆட்டத்தில் குகேஷ் டிரா கண்டாலே 0.5 புள்ளியுடன் உலக சாம்பியன் பட்டத்தை வசப்படுத்தி விடுவாா்.
14-ஆவது சுற்று: அதே நேரம் வியாழக்கிழமை 14-ஆவது சுற்று ஆட்டத்தில் நடப்பு சாம்பியன் டிங் லிரேன் வெள்ளை நிறக் காய்களுடன் ஆட உள்ளாா். 13-ஆவது சுற்றில் லிரேன் தோற்றாலும், கடைசி சுற்றில் லிரேன் வென்றால், 7-7 என்ற புள்ளிகள் அடிப்படையில் டை பிரேக்கா் கடைபிடிக்க செய்யலாம்.
1 டிரா, 1 வெற்றி: குகேஷ்-டிங் லிரேன் இருவரும் தலா 1 வெற்றி, 1 டிராவுக்காக போராடும் முனைப்பில் உள்ளனா். இதன் மூலம் 2024 உலக சாம்பியன் பட்டத்தை கைப்பற்ற முடியும்.
வெள்ளை நிறக் காய்களுடன் ஆடும் வீரா் முதல் நகா்த்தலை மேற்கொள்வதால் அவருக்கு சாதகமான நிலை உள்ளது. இதன் மூலம் ஆட்டத்தை அவா் கட்டுப்படுத்த வாய்ப்புள்ளது. கருப்பு நிறக் காய்களுடன் ஆடும் வீரா் தற்காப்புக்காக ஆடும் நிலைக்கு தள்ளப்படுவாா்.
டை பிரேக்கா் முறை: 14 சுற்றுக்கு பின்னரும் புள்ளிகள் சமநிலையில் இருந்தால், டை பிரேக்கா் முறை கடைபிடிக்கப்படும்.
வெள்ளிக்கிழமை (டிச. 13) டை பிரேக்கா் நடைபெறும். இதில் ரேபிட் முறையில் 4 ஆட்டங்கள் 15 நிமிஷங்கள் ஒவ்வொரு வீரருக்கும், முதலில் 2.5 புள்ளிகளை ஈட்டுபவா் வெற்றியாளா் ஆவாா்.
டை ஆனால் மினி ரேபிட் ஆட்டத்தில் 10 நிமிஷ ஆட்டம், 1.5 புள்ளியை முதலில் பெறுபவா் வெற்றியாளா்.
தொடா்ந்து டை ஆனால் பிளிட்ஸ் ரேபிட் ஆட்டம், இதில் 2 ஆட்டங்கள் 3 நிமிஷங்கள், முதலில் 1.5 புள்ளிகளை ஈட்டுபவா் வெற்றியாளா்.
சடன் டெத் பிளிட்ஸ்: தொடா்ந்து டை ஆனால் சடன் டெத் பிளிட்ஸ் முறை கடைபிடிக்கப்படும். இதில் வீரா்களுக்கு தலா 3 நிமிஷம், காய்கள் நிறம் மாற்றப்பட்டு எந்த வீரா் வெல்லுகிறாரோ அதுவரை நடைபெறும். ஒவ்வொரு மினி ஆட்டத்த்துக்கு முன்பு எந்த வீரா் வெள்ளை நிறக் காய்கள் என்பது குலுக்கல் மூலம் தீா்மானிக்கப்படும்.
பரிசுத் தொகை: உலக செஸ் சாம்பியன்ஷிப் போட்டி ஒட்டுமொத்த பரிசுத் தொகுப்பு ரூ.21.17 கோடியாகும். ஒவ்வொரு சுற்றிலும் வெல்பவா் ரூ.1.68 கோடி பெறுவாா். அதன்படி இருவரும் தலா ரூ.1.68 கோடி என மொத்தம் ரூ.3.36 கோடியை பெற்றுள்ளனா். மீதமுள்ள தொகை பிரிக்கப்படும். டை பிரேக்கா் முறை பின்பற்றினால் சாம்பியனுக்கு ரூ.10.83 கோடியும், ரன்னருக்கு ரூ.10 கோடியும் வழங்கப்படும்.
