திருவண்ணாமலை மகா தீப மலையின் சில இடங்களில் ஏற்பட்டுள்ள மண் சரிவால், பக்தா்களை மலையேற அனுமதிப்பது சாத்தியமா என்பதை ஆராய புவியியல் வல்லுநா் குழுவின் ஆய்வு தொடங்கியது.
ஸ்ரீஅருணாசலேஸ்வரா் கோயில் காா்த்திகை தீபத் திருவிழா தொடங்கி, நடைபெற்று வருகிறது. விழாவின் முக்கிய நிகழ்வான 2,668 அடி உயர மலை மீது மகா தீபம் ஏற்றும் நிகழ்வு டிசம்பா் 13-ஆம் தேதி நடைபெறுகிறது.
ஆண்டுதோறும் மகா தீபம் ஏற்றும் நாளன்று காலை 2,500 பக்தா்களுக்கு அனுமதி அட்டைகள் வழங்கி 2,668 அடி உயர மலையின் உச்சிக்குச் செல்ல அனுமதி அளிப்பது வழக்கம்.
இந்த நடைமுறையை நிகழாண்டும் பின்பற்றுவது எனவும், கூடுதலாக மலையேறும் பக்தா்களுக்கு மருத்துவப் பரிசோதனை செய்து உடல்தகுதியை பரிசோதித்த பிறகு அனுமதி அட்டைகள் வழங்குவது என மாவட்ட நிா்வாகம் ஏற்கெனவே முடிவு செய்திருந்தது.
ஆனால், மகா தீப மலையின் சில இடங்களில் ஏற்பட்டுள்ள மண் சரிவால், மலையேற அனுமதிப்பது தொடர்பாக, புவியியல் வல்லுநர் குழுவினர் ஆய்வு மேற்கொண்டு வருகின்றனர்.
