Tamil Live Breaking News : “அம்பேத்கருக்கு சமமாக இந்தியாவில் யாரும் இல்லை”

கோடநாடு கொலை, கொள்ளை வழக்கில் அதிமுக பொதுச்செயலாளர் எடப்பாடி பழனிசாமி மற்றும் சசிகலாவை நீதிமன்றத்தில் விசாரிக்க உயர்நீதிமன்றம் அனுமதி அளித்துள்ளது.

சம்பவம் நடந்த போது மாவட்ட எஸ்.பி.யாக இருந்த முரளி ரம்பாவையும் விசாரிக்கலாம் என உயர்நீதிமன்றம் அனுமதி வழங்கியுள்ளது.

திமுக ஆட்சியில் அதானி நிறுவனத்துடன் எந்த ஒப்பந்தமும் போடவில்லை. அதானியை முதலமைச்சர் மு.க.ஸ்டாலின் சந்திக்கவும் இல்லை.

அவதூறு பரப்புவோர் மீது சட்டப்படி நடவடிக்கை எடுக்கப்படும். உண்மையில்லாத குற்றச்சாட்டை எதிர்க்கட்சிகள் பரப்பி வருவது அரசியல் பண்பாடு அல்ல. திமுக ஆட்சியில் எந்த தனியார் நிறுவனத்துடனும் மின்வாரியம் நேரடி ஒப்பந்தம் செய்யவில்லை என அமைச்சர் செந்தில் பாலாஜி அறிக்கை.

மாநிலங்களவையில் எனது இருக்கையில் கிடந்த ரூபாய் நோட்டுகள் என்னுடையதல்ல என அபிஷேக் மனு சிங்வி விளக்கம்.

நான் ஒரே ஒரு ரூபாய் நோட்டுடன்தான் நேற்று அவைக்கு வந்தேன்; இதுபோன்று நடப்பதை இப்போதுதான் நான் கேள்விப்படுகிறேன்; வாசகங்கள் எழுதப்பட்டு ரூபாய் நோட்டுகள் பறிமுதல் செய்யப்பட்ட நிலையில் காங்கிரசின் அபிஷேக் மனு சிங்வி விளக்கம்.

தமிழ்நாடு வணிக வரித்துறை துணை ஆணையரின் உடல் போருர் ஏரியில் சடலமாக மீட்கப்பட்டுள்ளது.

போருர் அம்பாள் நகரில் வசித்து வந்த செந்தில்வேல் செங்கல்பட்டில் பணியாற்றி வந்தார்; செந்தில்வேலை காணவில்லை என நேற்று உறவினர்கள் புகார் அளித்த நிலையில், இன்று அவரது உடல் சடலமாக மீட்கப்பட்டுள்ளது. செந்தில்வேல் தற்கொலை செய்து கொண்டாரா அல்லது வேறு ஏதும் காரணமா என காவல்துறை விசாரணை  செய்து வருகிறார்கள்.

புயலால் தமிழ்நாடு கடுமையாக பாதிக்கப்பட்டுள்ளது; தமிழ்நாட்டுக்கு இடைக்கால நிவாரணமாக ₹2,000 கோடியை உடனடியாக விடுவிக்க வேண்டும்.

கடந்த முறை கேட்கப்பட்ட ₹37,000 கோடியை தற்போது வரை மத்திய அரசு வழங்கவில்லை; தேவைப்படும் நேரத்தில் நிதியை விடுவித்தால்தான் பாதிக்கப்பட்ட மக்களுக்கு உதவ முடியும். நிவாரணப் பணிகளை மாநில அரசு முழு வீச்சில் செய்து வருகிறது என மாநிலங்களவையில் எம்.பி. திருச்சி சிவா பேச்சு.

தமிழ்நாட்டில் ஸ்மார்ட் மீட்டர் ஒப்பந்தத்தை ரத்து செய்ய வேண்டும். 1.5 ஆண்டுகளுக்கு முன் குறிப்பிடப்பட்ட விலையில் ஸ்மார்ட் மீட்டர்களை வாங்கக்கூடாது.

ஸ்மார்ட் மீட்டர்கள் பொருத்தும் திட்டத்தை மத்திய அரசு அறிமுகப்படுத்தியுள்ளது. அதானி நிறுவனத்திற்கு ஸ்மார்ட் மீட்டர் ஒப்பந்தம் வழங்கப்படும் என அதிகாரிகள் கூறுகின்றனர். ஸ்மார்ட் மீட்டர் பொருத்தும் திட்டம் சீர்திருத்தம் என்பதை எவரும் மறுக்க முடியாது. வெளிப்படையான ஏல முறையில் ஸ்மார்ட் மீட்டர்களை கொள்முதல் செய்ய வேண்டும் என பாமக தலைவர் அன்புமணி ராமதாஸ் கோரிக்கை

சிதம்பரம் நடராஜர் கோயிலில் அனைத்தும் சரியாக நடந்தால் அரசு எதிலும் தலையிடாது.

வரலாற்றில் இல்லாத அளவிற்கு கோயில் சொத்துகளை அதிக அளவில் மீட்டுள்ளது தமிழ்நாடு அரசு. இதுவரை ₹6,955 கோடி மதிப்புள்ள கோயில் சொத்து மீட்கப்பட்டுள்ளது. 1,77,968 ஏக்கர் கோயில் நிலங்கள் ரோவர் கருவி மூலம் அளவீடு செய்யப்பட்டுள்ளன என சென்னை நுங்கம்பாக்கத்தில் இந்து சமய அறநிலையத்துறை அமைச்சர் சேகர்பாபு பேட்டி

ஃபெஞ்சல் புயல் பாதிப்புகளை பார்வையிடுவதற்காக மத்திய உள்துறை இணைச்செயலர் ராஜேஷ் குப்தா தலைமையிலான குழுவினர் இன்று சென்னை வருகின்றனர்.

மத்திய உள்துறை, பேரிடர் குழு, வேளாண்துறை, வருவாய்த்துறைகளைச் சேர்ந்த 8 பேர் வருகை தரவுள்ளனர்; சென்னை வரும் குழு, கடலூர், விழுப்புரம், திருவண்ணாமலை, கள்ளக்குறிச்சி, புதுச்சேரி பகுதிகளை பார்வையிடவுள்ளனர்.

எழுத்தாளரும் இயக்குநருமான ஜெயபாரதி (77) நுரையீரல் தொற்று காரணமாக காலமானார்.

1979ல் கிரவுட் பண்டிங் முறையில் ‘குடிசை’ என்ற படத்தை தயாரித்தவர், தமிழ்நாடு அரசின் 3 விருதுகளை பெற்ற புத்திரன் என்ற படத்தை 2010ல் இயக்கியவர் என்பது குறிப்பிடத்தக்கது.