தமிழ்நாட்டின் முன்னாள் முதல்வர் ஜெயலலிதா மறைந்த பிறகு, 2017-ல் கொடநாடு பங்களாவில் நடைபெற்ற கொள்ளைச் சம்பவமும், அப்போது பணியிலிருந்த காவலாளி, ஜெயலலிதாவின் கார் ஓட்டுநர் கனகராஜ், பங்களா சிசிடிவி ஆபரேட்டர் ஆகியோர் கொலை, சாலை விபத்து, தற்கொலை என அடுத்தடுத்து உயிரிழந்தனர். இந்த வழக்கு, ஏழு வருடங்களாக விசாரணையிலேயே இருக்கிறது. சி.பி.சி.ஐ.டி அதிகாரிகளும் விசாரணை நடத்திவருகின்றனர்.
இதற்கிடையில், உயிரிழந்த கனகராஜின் சகோதரர் தனபால் இந்த வழக்கில் கடந்த சில ஆண்டுகளுக்கு முன்பு கைதுசெய்யப்பட்டு, பின்னர் ஜாமீனில் வெளிவந்த பிறகு அ.தி.மு.க பொதுச் செயலாளர் எடப்பாடி பழனிசாமியைக் கொடநாடு விவகாரத்தில் தொடர்புப்படுத்திப் பேசிவந்தார்.
இதனால், தனபால் மீது சென்னை உயர் நீதிமன்றத்தில் அவதூறு வழக்கு தொடுத்த எடப்பாடி பழனிசாமி, அரசியல் எதிரிகளின் தூண்டுதலால் தனது நற்பெயருக்கு களங்கம் விளைவிக்கும் வகையில் அவர் பேசுவதாகவும், இனிமேல் இதில் தன்னை தொடர்புப்படுத்திப் பேசுவதற்கு தடைவிதித்து மானநஷ்ட ஈடாக ரூ. 1.10 கோடி வழங்க உத்தரவிடுமாறும் கோரியிருந்தார்.
இந்த நிலையில், எடப்பாடி பழனிச்சாமியின் மனு சென்னை உயர் நீதிமன்றத்தில் இன்று விசாரணைக்கு வந்தது. இதனை விசாரித்த நீதிபதி ஆர்.எம்.டி. டீக்காராமன், எடப்பாடி பழனிசாமியின் மனுவில் குறிப்பிட்டிருந்த கோரிக்கையின்படி, இந்த வழக்கில் அவரைத் தொடர்புப்படுத்திப் பேச தனபாலுக்குத் தடைவிதித்தார். மேலும், எடப்பாடி பழனிசாமிக்கு ரூ. 1.10 கோடி மானநஷ்ட ஈடாக வழங்குமாறும் தனபாலுக்கு நீதிபதி உத்தரவிட்டார்.
