சரியாக கோர்ட் தொடங்கும் சில நிமிடங்களுக்கு முன்னர் பெங்களூருவிலிருந்து வந்து சேர்ந்தார் முரசொலி செல்வம். அறிமுகமானதும், ‘எல்லாம் சரியாப் போயிட்டிருக்கில்லையா, ஏதும் பிரச்னை இல்லையே’ என விசாரித்து விட்டு,’அரசியல் கட்டுரைகளுக்கெதிரா இந்த மாதிரி வழக்குகள் வர்றதுலயும் அரசியல் இருக்கும். ஆனாலும் எழுதறப்ப கொஞ்சம் கவனமா இருக்கணும் தம்பி’ என்றார்.
அடுத்த சில நிமிடங்களில் நீதிமன்றத்துக்குள் நீதிபதி வர, நீதிமன்றக் கூண்டில் ஏறி நின்றார் செல்வம்.
தொடர்ந்து நானும் புகைப்படக்காரரும் அடுத்தடுத்து கூண்டிலேறி எங்கள் வழக்கறிஞர்கள் கூறியபடியே எங்கள் பதிலை முன்வைத்து விட்டு இறங்கினோம்.
விசாரணையின் முடிவில், பிறப்பிக்கப்பட்ட வாரன்ட்டை நிறுத்தி வைக்க நீதிபதி உத்தரவிட்டதைத் தொடர்ந்து நீதிமன்ற நடவடிக்கைகள் முடிந்தன.
கிளம்பும் போதும், ’தம்பிங்க ரெண்டு பேரும் சென்னை கிளம்ப ஏற்பாடு பண்ணிட்டீங்களா, அவங்களை பத்திரமா அனுப்பி விடுங்க’ என சூர்யா டிவி ஊழியர்களிடம் சொல்லி விட்டே சென்றார்.
மாநிலத்திலும் மத்தியிலும் திமுக அதிகாரத்திலிருந்த போதும் நீதிமன்றக் கூண்டில் முரசொலி செல்வம் ஏறி நின்றது அநேகமாக இது ஒன்றாகத்தான் இருக்கும்.
பிறகு, விசாரணையின் முடிவில் அந்த வழக்கு ஒன்றுமில்லாமல் முடிந்து போனது.
