தஞ்சாவூரில் அம்மா மக்கள் முன்னேற்றக் கழகத்தின் செயற்குழு மற்றும் பொதுக்குழுக் கூட்டம் தனியார் மண்டபத்தில் இன்று (அக்டோபர் 7) நடைபெற்றது. இதற்காக அக்கட்சியின் பொதுச் செயலாளர் டி.டி.வி.தினகரனை வரவேற்று, “வருங்கால முதல்வரே’, ‘முடி சூடா மன்னரே’, ‘அரசியலில் நேர்மையே’ போன்ற வாசகங்களுடன் ப்ளக்ஸ் பேனர்களை அக்கட்சியினர் வைத்திருந்தனர்.
நாட்டியக் குதிரைகள், கதகளி நடனம், முளைப்பாரி என ஊர்வலமாக வந்து தினகரனுக்கு வரவேற்பளித்தனர். மண்டபம் முழுவதையும் பவுன்சர்கள் கட்டுக்குள் வைத்திருந்தனர். மேடையில் பேசிய நிர்வாகிகள் பலரும் எடப்பாடி பழனிசாமியைக் கடுமையாகச் சாடினர்.
கூட்டம் முடிந்ததும் டி.டி.வி. தினகரன் செய்தியாளர்களிடம் பேசியதாவது, “சென்னையில் நடந்த விமானப் படை சாகச நிகழ்ச்சியைக் காண, 10 லட்சத்துக்கும் அதிகமான பொதுமக்கள் வந்த நிலையில், ஐந்து பேர் இறந்துள்ளனர். இவ்வளவு மக்கள் கூடும் நிலையில் தேவையான பாதுகாப்பு ஏற்பாடுகளைச் செய்திருக்க வேண்டும். இது முதல்வரின் கவனக் குறைவு என்று கூறுவதா? அல்லது அவரது கவனத்திற்குச் செல்லவில்லை எனக் கூறுவதா? போலீஸார் மீது குற்றம் சொல்வதா? விஞ்ஞானம் வளர்ச்சி அடைந்துள்ள நிலையில் இது போன்ற நிகழ்வுகள் குறித்து என்ன கூறுவது? இதற்கு முழு பொறுப்பையும் முதல்வர் தான் ஏற்க வேண்டும்.
