திருப்பதி கோயிலில் பயன்படுத்தப்பட்ட நெய்யில் விலங்குகளின் கொழுப்பு கலந்திருப்பதாக ஆந்திர முதலமைச்சர் சந்திரபாபு நாயுடு, ஓய்.எஸ்.ஆர் காங்கிரஸ் கட்சித் தலைவரும், முன்னாள் முதல்வரான ஜெகன் மோகன் ரெட்டி மீது கடும் குற்றச்சாட்டை முன்வைத்திருந்தார். இது நாடு முழுவதும் பெரும் பரபரப்பை ஏற்படுத்தியது.
இந்நிலையில் ஆந்திரா முன்னாள் அமைச்சரும், நடிகையுமான ரோஜா திருப்பதி லட்டு விவகாரத்தில் சந்திரபாபு நாயுடு குறித்து பேசியிருக்கிறார். இதுதொடர்பாக பேசிய ரோஜா, ” உண்மையில் மிகவும் கஷ்டமாக இருக்கிறது. திருப்பதி லட்டு விவகாரத்தில் சந்திரபாபு நாயுடு கடவுளோடு விளையாடி வருகிறார். சந்திரபாபு நாயுடு தனது சுயநலத்திற்காக எதுவும் செய்வார். ஆட்சிக்கு வந்து 100 நாட்களில் ஒரு திட்டமும் செய்யவில்லை. தனது தவறை மறைக்கும் விதமாக, லட்டு விவகாரத்தை கையில் எடுத்திருக்கிறார்.
திருப்பதி லட்டு விவகாரத்தில் தவறு செய்தவர்கள் மீது நடவடிக்கை எடுக்க வேண்டும். ஜெகன் மோகன் ரெட்டியை அரசியல் ரீதியாக பூஜ்யமாக்கவே சந்திரபாபு நாயுடு இதுபோன்ற செயலில் ஈடுபட்டு வருகிறார். சந்திரபாபு நாயுடுவுக்கு பக்தியும் இல்லை. கடவுள் மீது நம்பிக்கையும் இல்லை. கடவுளை தனது சுய நலத்துக்காக பயன்படுத்துகிறார். சந்திரபாபு நாயுடு கட்சி அலுவலகத்தில் இருந்து பொய்யான அறிக்கை வெளியிடப்பட்டு இருக்கிறது. லட்டு விவாகரத்தில் நடவடிக்கை எடுக்காமல், நாடகம் செய்து வருகிறார். கடவுள் மீது உண்மையான பக்தி இருக்கும் முதல்வர் என்றால், இந்த விவகாரத்தில் நேர்மையான விசாரணை நடத்தி சம்பந்தப்பட்டவர்களை தண்டித்திருக்க வேண்டும். மதத்தை வைத்து அரசியல் செய்து வருகிறார்.
