டெல்லியின் புதிய முதலமைச்சராகத் தேர்வு செய்யப்பட்ட பிறகு பத்திரிகையாளர்களைச் சந்தித்துப் பேசியிருக்கும் அதிஷி, “என்னை முதல்வராகத் தேர்ந்தெடுத்திருக்கும் எனது குரு அரவிந்த் கெஜ்ரிவாலுக்கு எனது நன்றியைத் தெரிவித்துக் கொள்கிறேன். என்னை நம்பி மிகப்பெரியப் பொறுப்பை கொடுத்துள்ளார். நான் சாதாரண குடும்பத்தில் இருந்து வந்தவள். ஒருவேளை, நான் வேறு கட்சியில் இருந்து இருந்தால் எனக்கு தேர்தலில் நிற்பதற்தான வாய்ப்புகூட கிடைத்திருக்காது. ஆனால், அரவிந்த் கெஜ்ரிவால் என்னை நம்பி எம்.எல்.ஏ. மற்றும் அமைச்சர் பதவியைக் கொடுத்தார். அதைத் தொடர்ந்து தற்போது, முதல்வர் பொறுப்பையும் கொடுத்திருக்கிறார்.
அவர் என் மீது வைத்துள்ள நம்பிக்கைக்கு உண்மையாக இருப்பேன். முதல்வராக என்னைத் தேர்வு செய்தது மகிழ்ச்சியாக இருந்தாலும், கெஜ்ரிவால் இன்று ராஜினாமா செய்யவுள்ளார் என்பது மிகவும் வருத்தமாகவுள்ளது. அரவிந்த் கெஜ்ரிவாலை மீண்டும் டெல்லியின் முதல்வராக்குவதே எங்கள் குறிக்கோள். அந்த ஒரே இலக்குடன் தேர்தல் வரை நான் முதல்வராக தொடர்வேன். கெஜ்ரிவாலின் வழிகாட்டுதலின் படி டெல்லி மக்களைப் பாதுகாத்து ஆட்சி நடத்துவேன்” என்று பேட்டியளித்திருக்கிறார்.
